Shymkentte onlaın oıyn satyp almaq bolǵan oqýshy alaıaqtarǵa 2 mıllıon teńge jibergen
ShYMKENT. KAZINFORM – Ol anasynyń bank kartasynyń derekterin bógde adamǵa joldap, nátıjesinde 2 mıllıon teńgeden astam qarjydan aıyryldy.
Shymkentte altynshy synyp oqýshysy onlaın oıyn satyp almaq bolyp, alaıaqtardyń arbaýyna tústi. Ózin «Free Fire» mobıldi oıynynyń jetildirilgen akkaýntyn satýshy retinde tanystyrǵan er adam jetkinshekti aldap, ony karta málimetteri men aýdarym jasaýǵa arnalǵan qupııa kodty jiberýge kóndirgen. Oqýshy alaıaqtyń nusqaýyna erip, anasynyń bank kartasyn sýretke túsirip, qajetti aqparatty joldaǵan.
Shotynan iri kólemde qarajattyń joǵalǵanyn baıqaǵan anasy dereý polıtsııaǵa júgindi. Jedel-izdestirý sharalary barysynda kúdikti anyqtalyp, ustaldy.
Shymkent qalalyq Polıtsııa departamentiniń baspasóz qyzmeti ata-analarǵa balalarymen ınternettegi qaýipsizdik erejeleri týraly jıi áńgimelesip turýdy eskertedi. Eshqashan bógde adamdarǵa bank kartasynyń derekterin berýge bolmaıtynyn qaperge salady.
Aıta keteıik, budan buryn Shymkentte «Dıkıı Armannyń» aınalasyndaǵy adamdar sottalǵanyn jazǵan bolatynbyz.