Shymkentte óndiristegi jazataıym oqıǵalardan 3 adam qaza taýyp, 14-i aýyr jaraqattandy
ShYMKENT. KAZINFORM — Shymkentte 2026 jyldyń alǵashqy alty aıynda 17 jazataıym oqıǵa tirkeldi.
Bıylǵy alty aıda Memlekettik eńbek ınspektsııasy komıtetiniń Shymkent qalasy boıynsha departamenti 238 tekserý júrgizip, 226 zań buzýshylyqty anyqtady. Nátıjesinde jalpy somasy 7,6 mln teńge bolatyn 45 ákimshilik aıyppul salyndy.
Departamenttiń bólim basshysy Ulbıke Rústemovanyń aıtýynsha, jazataıym oqıǵalar qurylys, óndiris, kommýnaldyq qyzmet, qyzmet kórsetý, baılanys, densaýlyq saqtaý, sport jáne temirjol salalarynda bolǵan.
— Alty aıda 17 jazataıym oqıǵa tirkelip, 3 adam qaıtys boldy, 14-i aýyr jaraqattandy. Eń aldymen jumys berýshiler qyzmetkerler aldyndaǵy azamattyq-quqyqtyq jaýapkershiligin mindetti túrde saqtandyrýǵa tıis. Eger bul talap oryndalmasa, jumys berýshi ákimshilik jaýapkershilikke tartylyp, óndiristegi oqıǵa saldarynan keltirilgen zııandy óteý mindeti ózine júktelýi múmkin, — dedi spıker.
Onyń aıtýynsha, eńbekke jaramsyzdyq kezeńinde zardap shekken qyzmetkerge ortasha jalaqysynyń 100 paıyzy mólsherinde tólem jasalyp, emdeý shyǵyndary óteledi. Al múgedektik belgilengen jaǵdaıda joǵaltqan eńbek qabileti deńgeıine sáıkes ótemaqy qarastyrylady.
— Qyzmetker qaza bolǵan jaǵdaıda onyń otbasyna jerleý shyǵyndaryn óteý úshin 100 AEK mólsherinde birjolǵy tólem tólenedi. Sonymen qatar asyraýshysynan aıyrylǵan adamdarǵa zańnamaǵa sáıkes aı saıynǵy tólemder júzege asyrylady, — dedi Ulbıke Rústemova.
Buǵan deıin Shymkentte jolaıryq qurylysynda 54 jastaǵy jumysshy qaza tapqanyn habarlaǵan edik.
