Shymkentte oqýshylar arasynda 11 sýıtsıd faktisi tirkelgen
ShYMKENT. KAZINFORM – Qala mektepterinde oqýshylar arasyndaǵy sýıtsıd, býllıng jáne erte júktilik boıynsha birneshe jaǵdaı anyqtaldy.
Shymkent qalasy bilim basqarmasynyń basshysy Qýanysh Ysqaqovtyń aıtýynsha, ótken jyly qalada oqýshylar arasynda 11 sýıtsıd faktisi jáne erte júktiliktiń 4 jaǵdaıy tirkelgen.
– Oqýshylar arasyndaǵy 11 sýıtsıd jaǵdaıynyń barlyǵy óz úıinde bolǵan jáne otbasylyq janjaldyń saldarynan týyndaǵan. Jalpy, jyl basynan beri mundaı fakti tirkelgen joq. Alaıda bıyl №7 mekteptiń oqýshysyna qatysty jaǵdaı bolǵanymen, qylmystyq is aıasynda onyń sýıtsıd ekeni rastalmady, – dedi spıker.
Onyń aıtýynsha, sýıtsıdtiń aldyn alý baǵytynda arnaıy ortalyq jumys istep jatyr.
– Shymkentte ótken jyly psıhologııalyq-pedagogıkalyq qoldaý ortalyǵy ashyldy. Onyń nátıjesinde oqýshylar arasynda óz-ózine qol jumsaý faktileri azaıdy. Máselen, 2024 jylmen salystyrǵanda 2025 jyly sýıtsıd kórsetkishi 40 paıyzǵa tómendedi, – dedi Qýanysh Ysqaqov.
Sonymen qatar qalada býllıngke qatysty 22 derek tirkelip, atalǵan faktiler boıynsha qylmystyq is qozǵalǵan.
Býllıngke baılanysty 400-den astam aryz túsken. Onyń aldyn alý maqsatynda ótken jyly «Aıqyn» baǵdarlamasy aıasynda barlyq mektepke beınekameralar ornatylǵan. Bul kameralar býllıngti anyqtaıtyn arnaıy baǵdarlamamen jabdyqtalǵan.
– Mysaly, qaladaǵy №142 mektepte býllıng jaǵdaıy anyqtaldy. Mekteptiń akt zalynda joǵary synyp oqýshylary tómengi synyp oqýshylaryna kúsh kórsetken. Bul jaǵdaı beınekamera arqyly anyqtaldy. Nátıjesinde mektep dırektory qyzmetinen bosatylyp, orynbasarlaryna tártiptik shara qoldanyldy. Atalǵan derek boıynsha qylmystyq is qozǵaldy, – dedi spıker.
Basqarma basshysy Shymkent qalasynda jasóspirimder arasyndaǵy quqyq buzýshylyqtyń aldyn alýǵa baǵyttalǵan «Tálimger» jobasy júıeli túrde júzege asyrylyp jatqanyn atap ótti.
– Qazir bul joba respýblıka boıynsha keńinen qolǵa alynǵan. Joba aıasynda qalamyzda quqyq qorǵaý organdarynyń qyzmetkerleri men ardagerleri mektepterge jumysqa qabyldanyp jatyr. Olar oqý oryndarynda quqyqtyq mádenıetke arnalǵan tárbıe saǵattaryn ótkizip, dáris oqıdy, – dedi ol.
Budan buryn Shymkentte bilim berý uıymdarynda 700 mln teńgeden astam qarjy zańsyz tólengenin jazǵan edik.
