Shymkentte oqýshy qyzdar bodı-massajben aınalysqan
ShYMKENT. KAZINFORM - Shymkentte 15 jastaǵy qyzdar bodı-massajben aınalysqan. Jasóspirimder bul jumysty ınternettegi habarlandyrý arqyly tapqan eken.
Buǵan deıin áleýmettik jelide oqýshy qyzdar eresek erkekterge bodı-massaj qyzmetin kórsetip kelgeni týraly aqparat tarady. Qyzdardyń biriniń anasy ıntımdik qyzmet kórsetildi delingen páter ishin vıdeoǵa túsirip alǵan. Beınejazba jelide paıda boldy.
Vıdeoda belgisiz erkekti de kórýge bolady.
«Meniń kámeletke tolmaǵan 15 jastaǵy qyzymdy osy jerge shaqyryp alyp kelgen. Mine, myna erkektiń otbasy bar shyǵar... Shaqyr, bárin túsir», - deıdi shymkenttik ana.
Belgili bolǵandaı, oqýshylar jumys istep, aqsha tapqysy kelgen eken. Sodan ınternettegi habarlandyrý arqyly jumysqa ornalasqan.
Jelide taraǵan vıdeoda qyzdardyń WhatsApp messendjeri arqyly bir-birine joldaǵan aýdıojazbalary da bar. Sondaı-aq, oqýshy qyzdardyń biri bul jolǵa qalaı kelgenin aıtyp bergen.
Bul oqıǵa boıynsha polıtsııa qylmystyq is qozǵap, tergeý júrgizip jatyr.
«Atalǵan fakt bıyl mamyr aıynda anyqtaldy. Qylmystyq is qozǵaldy. Qatysy bar barlyq adamdar anyqtalyp, polıtsııaǵa jetkizildi. Birqatar saraptamalar taǵaıyndaldy. Qajetti tergeý sharalary júrgizilip jatyr», - delingen qalalyq Polıtsııa departamentiniń málimetinde.
