Shymkentte nemis kompanııasynyń atyn jamylǵan kontrafakt túsqaǵaz jelimi tárkilendi
ASTANA. KAZINFORM – Jyl basynan beri taýar tańbalaryn zańsyz paıdalaný boıynsha 58 ákimshilik is qozǵaldy jáne bıýdjetke 4 mln teńgeden astam qarajat óndirildi. Bul týraly QR Ádilet mınıstrliginiń resmı ókili Talǵat Ýálı aıtyp berdi.
2024 jyldyń birinshi toqsanynda aýmaqtyq ádilet organdary avtorlyq quqyq ıeleriniń shaǵymdarymen Qazaqstanda qorǵalatyn taýar tańbalarynyń zańsyz paıdalanylýyna qatysty jospardan tys 61 tekserý júrgizdi.
«Ákimshilik quqyq buzý týraly kodekstiń 158-baby boıynsha 58 is qozǵalyp, bıýdjetke jalpy somasy 4 539 914 teńge óndirildi. Zańsyz aınalymnan jalpy somasy 24 mln teńgeni quraıtyn 82 435 kontrafaktilik ónim tárkilendi. Atap aıtqanda, Almaty qalasynda – 20 tekserý júrgizilip 20 quqyqbuzýshylyq deregi anyqtaldy jáne Qaraǵandy oblysynda – 9 tekseris júrgizilip 8 quqyqbuzýshylyq anyqtaldy», - dedi T. Ýálı mınıstrlik uıymdastyrǵan brıfıngte.
Bıyl naýryz aıynda Shymkent qalasy ádilet departamentiniń qyzmetkerleri «Henkel» kompanııasy ókilderiniń shaǵymymen kóterme taýar satýmen aınalysatyn JShS birine jospardan tys tekserý júrgizdi.
Tekserý barysynda «METYLAN» túsqaǵaz jelimi taýar belgisin zańsyz paıdalaný faktisi anyqtaldy.
«Tekserý nátıjesi boıynsha 7 mıllıon teńgeden astam somaǵa 14 276 býma kontrafaktilik ónim tárkilendi. Búgingi tańda kináli tulǵa QR ÁQBtK-niń 158-baby boıynsha ákimshilik jaýapkershilikke tartyldy. Tárkilengen ónimder sot sheshimi boıynsha joıylady. Ádilet mınıstrligi jalǵan ónimderde kóbinese toksınder, allergender, kantserogender, aýyr metaldar jáne t.b. zııandy nemese tyıym salynǵan zattar bar ekenin eske salady. Kórsetilgen sıpattamalarǵa, sapaǵa jáne qaýipsizdikke sáıkes kelmeıtin ónimdi paıdalaný ýlanýǵa, allergııalyq reaktsııalarǵa jáne aǵzanyń durys jumys istemeýine ákelýi múmkin», - dedi T. Ýálı.
