Shymkentte nebári 740 jáne 935 gramm bolyp týǵan egizder úıine shyǵaryldy
ShYMKENT. KAZINFORM — Shymkentte salmaǵy 740 jáne 935 gramm bolyp týǵan egizder 85 kún boıy dárigerlerdiń baqylaýynda boldy.
Shymkent qalalyq perzenthanasynyń dárigerleri júktiliktiń 29 aptasynda ómirge kelgen egiz qyzdardy aman alyp qaldy. Náresteler kesar tiligi arqyly dúnıege kelgen. 44 jastaǵy ana úshin kópten kútken egizderdiń ómirge kelýi qýanyshpen qatar alańdaýshylyq ta týdyrǵan.
Áleýmettik medıtsınalyq saqtandyrý qory Shymkent qalalyq fılıalynyń málimetinshe, shala týǵan sábıler birden jansaqtaý bólimine jetkizilip, alǵashqy 23 táýlik boıy qarqyndy medıtsınalyq kómek aldy. Jaǵdaılary turaqtanǵannan keıin náresteler patologııasy bólimine aýystyryldy.
Dárigerlerdiń aıtýynsha, merziminen buryn týǵandyqtan sábılerdiń ókpesi tolyq jetilmegen. Olarǵa tynys alý júıesin qoldaýǵa baǵyttalǵan em júrgizilip, bronh-ókpelik dısplazııa boıynsha medıtsınalyq kómek kórsetildi. Dárigerler nárestelerdiń tynys alýyn, tamaqtanýyn jáne salmaq qosýyn táýlik boıy baqylaýda ustady.
— Mundaı salmaqta dúnıege kelgen náresteler erekshe kútim men úzdiksiz medıtsınalyq baqylaýdy qajet etedi. Egizderdiń jaǵdaıy birtindep jaqsaryp, salmaq qosa bastady. 85 kúnnen keıin olardy úılerine shyǵardyq, — dedi Shymkent qalalyq perzenthanasynyń dáriger-neonatology Nılýfar Tursymetova.
Qazir egizderdiń jaǵdaıy turaqty. Anasy balalardyń kútimin úı jaǵdaıynda jalǵastyryp jatyr.
Aıta keteıik, Shymkentte jyl basynan beri neonatologtar salmaǵy 500 gramǵa deıin bolyp týǵan eki sábıge jáne salmaǵy 1,5 kelige deıingi 150-den astam nárestege medıtsınalyq kómek kórsetken.
Buǵan deıin elimizde egizder men úshemder kóbine qaı óńirde dúnıege keletini týraly habarlaǵan edik.
