Shymkentte múgedektigi bar azamattarǵa ınvataksı men sýrdoaýdarmashylar qyzmet kórsetýde
ShYMKENT. KAZINFORM - Shymkentte erekshe qajettilikteri bar adamdardyń daýys berýine jaǵdaı jasalǵan.
Shymkenttikter daýys berýge belsendi túrde qatysyp jatyr. Sonyń ishinde múgedektigi bar azamattarda óz tańdaýlaryn jasap, daýys berýde.
Jalpy qalada erekshe qajettilikteri bar 3615 saılaýshy tirkelgen jáne olarǵa yńǵaıly bolý úshin saılaý ýchaskelerinde barlyq qajetti jaǵdaılar jasalǵan. 1512 múmkindigi shekteýli azamat úshin 28 mamandandyrylǵan ınvataksı jumys isteıdi jáne olardy ýchaskelerge tasymaldaýdy qamtamasyz etedi.
Estý qabileti buzylǵan 1423 azamatqa 65 sýrdoaýdarmashy kómektesedi jáne olardy ýchaskelerde ertip júredi. Kórý qabileti buzylǵan 680 turǵynǵa daýys berý úshin yńǵaıly jáne qoljetimdi bolýy úshin taktıldi joldar, úlkeıtkishter, Braıldi bıýlletender, qulaqqaptar jáne basqa da arnaıy qurylǵylar ornatylǵan.
Aıta keteıik, Shymkentte barlyǵy 344 saılaý ýchaskesi bar. Onyń 23-i jabyq, bul azamattardyń erekshe sanattary úshin daýys berý múmkindigin qamtamasyz etedi. Al, qalada 18 jasqa tolǵan 660 563 turǵyny daýys berýge quqyly.
