Shymkentte muǵalim 7 jasar oqýshy qyzǵa azǵyndyq jasady — polıtsııa jaýaby

ShYMKENT. KAZINFORM — Shymkentte oqýshy qyzǵa azǵyndyq áreket jasady degen kúdikpen mektep muǵalimi qamaýǵa alyndy.

Áleýmettik jelide taraǵan aqparatqa sáıkes, mektep muǵalimi 7 jasar oqýshy qyzdyń qarsylasqanyna qaramastan denesine qol júgirtip, ádepsiz áreketter jasaǵan.

Oqýshyǵa qatysty quqyqqa qaıshy áreket bolǵanyn Shymkent qalalyq bilim basqarmasy rastady.

Vedomstvo málimetinshe, atalǵan jaǵdaı «Nurtas» jekemenshik mektebinde bolǵan.

— Kámeletke tolmaǵan qyz balaǵa ınformatıka pániniń muǵalimi tarapynan quqyqqa qaıshy áreketter jasalǵany anyqtaldy, — dep málimdedi vedomstvo.

Shymkent qalalyq polıtsııa departamentiniń málimdeýinshe, kámeletke tolmaǵan qyzǵa qatysty tıisý faktisi boıynsha qylmystyq is qozǵaldy.

— Kúdikti retinde Shymkent qalasynyń turǵyny ustalyp, polıtsııa bólimine jetkizildi. Qazirgi tańda jedel-tergeý toby oqıǵanyń barlyq mán-jaıyn jan-jaqty, tolyq ári obektıvti anyqtaýǵa baǵyttalǵan keshendi is-sharalar júrgizip jatyr, — delingen polıtsııa habarlamasynda.

Sondaı-aq, beınebaqylaý kameralarynyń jazbalary zerdelenip, kýágerler men ózge de tulǵalardan jaýap alynyp jatyr.

— Tergeý barysy departament basshylyǵynyń erekshe baqylaýynda. Barlyq tergeý áreketteri qoldanystaǵy zańnama talaptaryna sáıkes júzege asyrylady, — dep naqtylady polıtsııa departamenti.

Budan buryn Túrkistan oblysynda 15 jastaǵy qyzdy zorlaǵan zeınetker sottalǵanyn jazǵan edik.