Shymkentte Myrzahmet, Nurmahanbet, Dinmuhammed atty úshem dúnıege keldi
ShYMKENT. KAZINFORM — Shymkent turǵyny Aıgúl Baqytjanqyzy úshem dúnıege ákeldi. 24 jastaǵy jas ana merziminen buryn, ıaǵnı júktiliktiń 31-aptasynda qalalyq perzenthanada bosanǵan.
Dúnıege kelgen sábılerdiń úsheýi de — ul bala. Olarǵa Myrzahmet, Nurmahanbet, Dinmuhammed esimderi berildi.
NÁrestelerdiń biriniń salmaǵy — 1580 gramm bolsa, ekinshisi — 1640 gramm bop dúnıege keldi.
Al úshinshi sábıdiń salmaǵy — 1610 gramm.
Qalalyq densaýlyq saqtaý basqarmasyndaǵylar dárigerler úshemdi aldymen jansaqtaý bóliminde baqylaýda ustaǵanyn, tıisti em-sharalardy jasap, keıin palataǵa aýystyrǵanyn aıtty.
Salmaq qosyp, jaǵdaıy jaqsarǵan sábıler men jas anany búgin perzenthana qyzmetkerleri saltanatty rásimmen úıine shyǵaryp saldy.
Aıta keteıik, Myrzahmet, Nurmahanbet, Dinmuhammed — jyl basynan beri Shymkentte dúnıege kelgen tórtinshi úshem.
Bıyl qalada 10913 sábı dúnıege kelgen. Onyń 5579-y — ul bolsa, 5334-i — qyz. Egizderdiń sany — 107.
Buǵan deıin Shymkenttiń 31 jastaǵy turǵyny úshem dúnıege ákelgen bolatyn. Olarǵa Atambaı, Musa, Múslim esimderi berildi.
Sondaı-aq Qostanaı turǵyny Aqshagúl Ábdirahmanova bes balasynan keıin úshem bosandy.
Bul — sońǵy 6 jyldyń ishinde Qostanaıda jaryq dúnıe esigin ashqan alǵashqy úshem.
Qala ákimi otbasy men jańa týǵan nárestelerge oblys ortalyǵyndaǵy jańa páterdiń kiltin tabys etken bolatyn.
