Shymkentte merekelik bir rettik áleýmettik kómek kimderge beriledi
ShYMKENT. KAZINFORM – Merekelik jáne ataýly kúnderge oraı beriletin bir rettik áleýmettik kómek úsh mańyzdy dataǵa oraı qarastyrylǵan. Sáýir men mamyr aılarynda mundaı qoldaý 1876 adamdy qamtıdy.
Qala ákimdiginiń málimetine súıensek, 26 sáýir – Chernobyl atom elektr stantsııasy apatynyń qurbandaryn eske alý kúnine oraı 192 adam jáne 7 mamyr – Otan qorǵaýshylar kúninde Uly Otan soǵysynyń ardagerlerine teńestirilgen 181 adam 194 625 teńge kóleminde kómek alady.
– Sonymen qatar 64 875 teńge kólemindegi bir rettik tólem 9 mamyr – Jeńis kúnine oraı tyl eńbekkerleri sanalatyn 1280 adamǵa, Uly Otan soǵysy kezinde jaraqattan nemese aýrýdan qaıtys bolǵan múgedektigi bar adamdardyń ekinshi ret nekege turmaǵan 60 jubaıyna jáne qaza tapqan áskerı qyzmetshilerdiń 163 otbasyna beriledi, – delingen ákimdik taratqan aqparatta.
Atalǵan qarajat azamattardyń shottaryna avtomatty túrde aýdarylady. Bir rettik áleýmettik kómek qalalyq máslıhattyń 2024 jylǵy 19 naýryzdaǵy sheshimimen bekitilgen.
Aıta keteıik, qazirgi tańda Shymkentte Uly Otan soǵysynyń kózi tiri ardagerleri qalmaǵan. Ótken jyldyń qarashasynda sońǵy maıdanger Murataly Tólepbergenuly 101 jasynda dúnıeden ótti.
Budan buryn Qaraǵandy oblysynda Jeńis kúnine oraı maıdangerlerge 5 mıllıon teńgeden beriletini habarlanǵan edi.
