Shymkentte memlekettik baǵdarlama aıasynda ıntensıvti alma baǵyna bólingen qarjy jymqyryldy
ASTANA. KAZINFORM – Qarjylyq monıtorıng agenttiginiń Shymkent qalasy boıynsha departamenti ıntensıvti alma baqtaryn qurý jáne damytýǵa arnalǵan memlekettik baǵdarlama aıasynda bólingen bıýdjet qarajatyn jymqyrý faktisi boıynsha tergeýdi aıaqtady.
Agenttiktiń baspasóz qyzmetiniń habarlaýynsha, «Intensıvti alma baqtaryn daıyn kúıinde tapsyrý» baǵdarlamasy sheńberinde jobalardy qarjylandyrý «Aýyl sharýashylyǵyn qarjylaı qoldaý qory» AQ arqyly júzege asyrylǵan.
Baǵdarlamanyń negizgi maqsaty – daıyn ınfraqurylymy bar aýyl sharýashylyǵy jerlerin kásipkerlerlik sýbektilerine lızıngke berý bolǵan.
Tergeý amaldaryna saı, Qordyń burynǵy basqarma tóraǵasy J.D. Omarov baılanysy bar tulǵalar men baqylaýyndaǵy uıymdarda, sonyń ishinde «Green Mart Kazakhstan» JShS-in tarta otyryp, memlekettik qarajatty jymqyrý shemasyn uıymdastyrǵan.
Taýarlar men jumystardy satyp alý belgilengen rásimderdi buza otyryp negizinen bir kózden alý tásilimen, básekelestik orta qamtamasyz etpeı júrgizilgen.
Jabdyqtardyń, materıaldardyń jáne qurylys-montaj jumystardyń quny jasandy túrde ósirilgen, al kózdelgen jumystardyń bir bóligi is júzinde oryndalmaǵan.
Soǵan qaramastan, jalǵan qabyldaý-tapsyrý aktileri rásimdelip, solardyń negizinde bıýdjet qarajaty aýdarylǵan. Nátıjesinde memleketke 430 mln teńgeden astam somaǵa zalal keltirilgen.
Qosymsha agroónerkásipti memlekettik qoldaý sheńberinde bólingen ınvestıtsııalyq sýbsıdııalardy zańsyz alý faktileri de anyqtaldy.
Osy maqsatta aýyl sharýashylyǵy kooperatıvteri qurylyp, olardy arqyly baqtardy damytýǵa jáne jumsalǵan shyǵyndardy óteýge arnalǵan sýbsıdııa alýǵa ótinimder berilgen.
Nátıjesinde olardyń shottaryna jalpy somasy 327 mln teńgeden astam bıýdjet qarajaty aýdarylǵan. Alaıda naqtysynda kórsetilgen maqsattarǵa qarajattyń tek shamamen 20%-y ǵana jumsalyp, qalǵan bóligi 250 mln teńgeden astam qarjy senimdi adamdar arqyly qolma-qol aqshaǵa aınaldyrylyp, maqsatsyz paıdalanylǵan.
- Sot sanktsııasymen jalpy aýdany 108 gektar bolatyn quny 1 mlrd teńgeden asatyn jer ýchastkelerine tyıym salyndy. Kúdikti J.D. Omarov qamaýǵa alyndy. Qylmystyq is sotqa joldandy. Eske salsaq, atalǵan fakt boıynsha Qordyń burynǵy basqarýshy dırektory M.K. Iskakov men «Green Mart Kazakhstan» JShS-niń basshysy R.B. Sazynbek 4 avtokólik tárkileýmen birge 8 jylǵa bas bostandyǵynan aıyrý jazasyna sottalǵan, - delingen habarlamada.
QR Konstıtýtsııasynyń 77-babynyń 3-tarmaǵynyń 1-tarmaqshasyna jáne QR Qylmystyq-protsestik kodeksiniń 19-babynyń 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árkim kinásiz dep esepteledi.
Osyǵan deıin Qostanaıda 3 mlrd teńge sýbsıdııa jymqyrý isi boıynsha úkim shyqty.
