Shymkentte memleket menshigine ótken 321 jer ýchaskesi úshin 7,5 mlrd teńge tólendi

ShYMKENT. KAZINFORM — Jyl basynan beri basqarmaǵa jeke jáne zańdy tulǵalardan, sondaı-aq memlekettik uıymdardan 3 myńnan astam aryz-shaǵym tústi. 

Shymkent qalasy jer qatynastary basqarmasynyń basshysy Azat Islamovtyń aıtýynsha, bıyl memleket menshigi úshin jalpy 398 jer ýchaskesi májbúrlep ıelikten shyǵaryldy.

Onyń ishinde aýmaǵy 137,4 gektar 321 jer ýchaskesine bıýdjetten 7,5 mlrd teńge kóleminde ótemaqy tólendi. Sonymen qatar jalpy alańy 9,71 gektar 51 jer ýchaskesiniń ıelerine teń baǵaly jer ýchaskeleri berildi.

— Ýaqytsha paıdalaný quqyǵyndaǵy jalpy alańy 46 gektar bolatyn 11 jer ýchaskesi sot sheshimi negizinde ótemaqysyz memleket menshigine ótkizildi. Jalpy alańy 247 gektar 8 jer ýchaskesi jer paıdalanýshylardyń óz erkimen bas tartýyna baılanysty ótemaqysyz memleketke alyndy. Sondaı-aq zańsyz tabystalǵan 150 gektar 7 jer ýchaskesi tegin qaıtaryldy, — dedi ol.

Vedomstvonyń málimetinshe, bıyl qala aýmaǵynda zańsyz salynǵan jáne nysanaly maqsatyna saı paıdalanylmaǵan jerlerge qatysty tıisti sharalar qoldanyldy.

Atap aıtqanda, «Kóktem bazary», «Garant», «Akatsııa» jáne «Arman» saýnasy aýmaǵyndaǵy zańsyz salynǵan saýda qatarlaryn buzý jónindegi ister sotta qaralyp jatyr.

Budan buryn Shymkentte 100-den asa nysan qujatty tolyq rásimdemeı qurylys júrgizgenin jazǵan edik.