Shymkentte mekteptiń bas býhgalteri 400 mln teńgeden astam qarjyny jymqyrǵan

ShYMKENT. KAZINFORM – Shymkent qalasynda mekteptiń bas býhgalteri asa iri kólemde bıýdjet qarjysyn jymqyrǵany jáne qylmystyq jolmen alynǵan aqshany zańdastyrǵany úshin sottaldy.

Sot materıaldaryna sáıkes, aıyptalýshy memleketke 451 173 978 teńge mólsherinde materıaldyq shyǵyn keltirgen. Ol qylmystyq jolmen alynǵan qarajatqa avtokólikter, páterler, jer telimi jáne baǵaly qaǵazdar satyp alǵan.

Sotta áıel kinásin tolyq moıyndap, shyn júrekten ókinish bildirdi jáne jazany óteýdi keıinge qaldyrýdy surady. Sot onyń bul ótinishin, sondaı-aq kámeletke tolmaǵan balalarynyń baryn eskerdi.

Sot, áıeldi Qylmystyq kodekstiń 189-baby 4-bóliginiń 2-tarmaǵy, 218-baby 3-bóliginiń 1, 3-tarmaqtary boıynsha kináli dep tanyp, túpkilikti 8 jyl bas bostandyǵynan aıyrý jazasyn taǵaıyndady.

Úkim áli zańdy kúshine engen joq.