Shymkentte mekteptiń apatty sportzaly buzyla ma, jóndele me
ShYMKENT. KAZINFORM – Qaınarbulaq turǵyn alabynda ornalasqan mektep sportzalynyń bolashaǵy qaıta júrgiziletin memlekettik saraptama nátıjesinde anyqtalady. Tekserý nátıjesine qaraı ǵımaratty qalpyna keltirý nemese jańa nysan salý týraly sheshim qabyldanady.
Qala ákiminiń orynbasary Sársen Quranbektiń aıtýynsha, bul máselede ádil baǵalaý úshin elimizdegi qurylys jáne sáýlet salasyndaǵy birden-bir memlekettik ǵylymı-zertteý jáne jobalaý ınstıtýty – «QazNIISA» AQ-ǵa júginý týraly sheshim qabyldanǵan.
– Saraptama shamamen eki aıǵa sozylady. Onyń qorytyndysyna sáıkes, sportzaldy qalpyna keltirý nemese jańa nysan salý jaıy anyqtalady. Eger tekserý barysynda merdiger uıymnyń kinási anyqtalsa, másele sot tártibimen qaralady. Al mektep basshylyǵy tarapynan salǵyrttyq anyqtalǵan jaǵdaıda tıisti sharalar qabyldanady, – dedi ol.
Apatty dep tanylǵan sportzal mekteptiń negizgi korpýsyna japsarlas ornalasqan. Qazirgi ýaqytta qaýipsizdik úshin ǵımarattyń aınalasy tolyq qorshalyp, oqýshylardyń ómiri men densaýlyǵyna tónýi múmkin qaýipterdiń aldyn alý sharalary qabyldanǵan.
Kún sýyq kezde dene shynyqtyrý sabaǵy synyp bólmelerinde ótkizilse, jyly mezgilde syrtta uıymdastyrylady.
Aýdany shamamen 600 sharshy metrdi quraıtyn mekteptiń sportzaly 8 jyl buryn paıdalanýǵa berilgen jáne apatty dep tanylǵan.
Mamandardyń málimetinshe, ǵımaratta eden men irgetastyń shógýi baıqalǵan, qabyrǵalarda jaryqtar paıda bolǵan, sondaı-aq shatyrdyń tehnıkalyq jaǵdaıy da alańdaýshylyq týdyrady.
Qalalyq qurylys basqarmasy buǵan deıin habarlaǵandaı, alǵashqy aqaýlar 2021 jyly anyqtalǵan. Mektepti salǵan bas merdigerge kemshilikterdi joıý týraly birneshe ret nusqama berilgenimen, tıisti jumystar oryndalmaǵan. Nátıjesinde materıaldar qalalyq orta sapasy jáne baqylaý basqarmasyna joldanyp, kompanııanyń lıtsenzııasyn qaıta qaraý sekildi sharalar qoldaný usynylǵan.
Alǵashqy saraptamaǵa sáıkes, 2300 oqýshy bilim alatyn ǵımaratta irgetas pen qabyrǵalardy nyǵaıtýdy kózdeıtin kúrdeli jóndeý qajet bolǵan. Sonymen qatar sportzal astyndaǵy topyraqqa bir aı kóleminde geologııalyq zertteý júrgizilgen.
Budan buryn drondar men JI zańsyz qurylys nysandaryn anyqtaıtynyn jazǵan edik.