Shymkentte mektepten órt shyǵyp, balalar úılerine qaıtaryldy
ShYMKENT. KAZINFORM - Shymkentte jalpy orta mektep ǵımaratynan órt shyqty. Oqıǵa Eńbekshi aýdany Bazar qaqpa turǵyn alabyndaǵy mektepte bolǵan.
Qalalyq Tótenshe jaǵdaılar departamentiniń málimetinshe, №104 jalpy orta mektebiniń «A» korpýsynyń shatyry men aǵash taqtaıshalar janǵan. Qyzyl jalyn 280 sharshy metr aýmaqty sharpyǵan. Bul ǵımaratta tek bastaýysh synypta oqıtyn balalar bilim alady.
«Janyp jatqan mektep ǵımaraty ishinen birinshi aýysymda oqıtyn 350 oqýshy men 25 muǵalim órt sóndirýshiler kelip jetkenge deıin syrtqa shyǵyp úlgergen. Órt saǵat 10.46-da oqshaýlanyp, saǵat 11.15-te tolyǵymen sóndirildi. Qyzyl jalyndy sóndirýge TJD jeke quramnan 52 qyzmetker, 8 tehnıka jumyldyryldy»,-dedi qalalyq TJD.
Órt kezinde qaza tapqandar men zardap shekkender joq.
Aldyn ala boljam boıynsha órt elektr symdarynyń qysqa tuıyqtalýynan shyqqan.
Mektep dırektory Baýyrjan Raýalıovtyń aıtýynsha, ǵımarat shatyryndaǵy tútindi birinshi bolyp aýla kezekshisi baıqaǵan. Ol dereý dabyl batyrmasyn basyp, mektep ishindegi oqýshylar men qyzmetkerler 2-3 mınýt ishinde ǵımarattan shyǵyp úlgergen. Sanaýly mınýttarda oqıǵa ornyna órt sóndirýshiler jetken.
«Bizdiń mektepte órt bolǵan jaǵdaıǵa qatysty oqý-jattyǵý jumystary turaqty túrde ótkizip keledi. Sondyqtan balalar arasynda shoshý nemese dúrbeleńge salyný baıqalmady. Dereý ata-analaryna habar berildi»,-dedi bilim uıasynyń basshysy.
Mektep dırektory órt shyqqan «A korpýsynda tek bastaýysh synyp oqýshylary bilim alatynyn, al 5-11 synyp oqýshylary oqıtyn negizgi korpýsqa qaýip tónbegenin aıtty. Degenmen bilim basqarmasynyń sheshimimen oqıǵadan keıin eki ǵımarattaǵy barlyq oqýshyyń ata-anasyna habar berilip, balalar úılerine jiberilgen. Al ekinshi aýysymda oqıtyn balalar qashyqtan oqyp jatyr.
«Erteń negizgi ǵımarattaǵy bilim alatyn 5-11 synyp oqýshylary dástúrli formatta oqıdy. TJD mamandary ol ǵımaratqa eshqandaı qaýip tónbegenin aıtty. Al órt shyqqan «A» korpýsyndaǵy bastaýysh synyp oqýshylaryna qatysty qalalyq bilim basqarmasynan buıryq kútip otyrmyz. Olar onlaın nemese offlaın oqýy múmkin. Ol týraly ata-analarǵa mindetti túrde habarlaıtyn bolamyz»,-dedi mektep dırektory Baýyrjan Raýaılov.
Aıta keteıik, №104 jalpy orta mektebinde 1547 bala bilim alady. Onyń 700-i bastaýysh synypta oqıdy.
