Shymkentte mektep janyndaǵy prıton jabyldy

ShYMKENT. KAZINFORM - Saýna qyzmetkerleri kúdikti dep tanylyp, qamaýǵa alyndy.

Qylmystyq kodekstiń 309-baby 2-bóligi 1-tarmaǵy jezókshelikpen aınalysý úshin prıton uıymdastyrý jáne ony ustaý, jeńgetaılyq faktisi boıynsha Shymkent qalasy Polıtsııa departamentinde tirkelgen qylmystyq is tergelip jatyr. Táýke han dańǵyly 60/7-úıde ornalasqan 32 páterdiń barlyǵy monsha jáne qonaqúı kesheni retinde qaıta jabdyqtalǵany jáne onda ıntımdik qyzmet kórsetilgeni anyqtalǵan.

Qylmystyq is aıasynda saýna qyzmetkerleri kúdikti dep tanylyp, úsheýi qamaýǵa alynǵan.

- Bıyl 2 aqpanda GASK basqarmasy, SES, Ońtústik Jaryq Tranzıt jáne TJD qyzmetkerleriniń qatysýymen de keshendi tekserý júrgizildi. Tekserý barysynda Ákimshilik quqyq buzýshylyq týraly kodekstiń 316-babynyń talaptary buzylǵany anyqtaldy. Osyǵan baılanysty «Arman-1» saýnasynyń qyzmeti toqtatylyp, nysan mórlendi. Osy bappen ákimshilik quqyqbuzýshylyq týraly hattama toltyrylyp, Shymkent qalasynyń ákimshilik sotyna joldandy. Úsh kúdiktige qatysty aıyptaý aktisi jasalyp, is ári qaraı zerdeleý jáne sotqa joldaý úshin qalalyq prokýratýraǵa jiberildi, - dedi Shymkent qalasy ákiminiń orynbasary, resmı ókil Sársen Quranbek.

Aıta keteıik, budan buryn Sársen Quranbek Shymkent qalasy ákimdiginiń resmı ókili bolyp bekitilgenin jazǵan bolatynbyz.