Shymkentte mektep terezesin jýǵan muǵalim abaısyzda qulap, aýrýhanaǵa tústi
ShYMKENT. KAZINFORM — Shymkentte Maǵjan Jumabaev atyndaǵy № 39 mekteptiń bıologııa páni muǵalimi kabınette tereze jýyp júrip, oryndyqtan qulap, jaraqattandy. Osyǵan baılanysty mektep dırektoryna qatysty qyzmettik tekserý bastalyp, dırektordyń orynbasaryna tártiptik jaza qoldanyldy.
Oqıǵa tamyz aıynyń sońynda, kabınetterdi jańa oqý jylyna daıyndaý kezinde bolǵan. Pedagog Nurgúl Janǵabylovanyń aıtýynsha, mektep ákimshiligi muǵalimderge 1 qyrkúıekke deıin terezelerdi ózderi jýyp, synyptardy retke keltirýdi tapsyrǵan.
Muǵalim terezeni jýý úshin oryndyqqa shyqqan. Alaıda tepe-teńdigin joǵaltyp, edenge qulap ketken. Oqıǵa mektepte ornatylǵan beınebaqylaý kamerasyna túsip qalǵan. Pedagogtiń aıtýynsha, qulaǵannan keıin qatty aýyrǵandyqtan, biraz ýaqyt ornynan tura almaǵan. Oqıǵa ornyna kelgen jedel járdem brıgadasy ony aýrýhanaǵa jetkizgen.
@symbat.galymbekuly Shymkentte mektep muǵalimi kabınettiń terezesin jýamyn dep ólim aýzynan qaldy. Oryndyqqa shyǵyp, iske kiriskeli jatqan bıologııa pániniń ustazy ońbaı qulaǵan. Jaraqat alyp, aýrýhanada emdelip shyqqan pedagog zańsyz tapsyrma bergen bilim oshaǵynyń basshylyǵy jazalansyn dep otyr. Sebebi, dırektor men orynbasary qıt etse ustazdardy qara jumysqa salatyn kórinedi. #shymkent #mektep #pedagog #qarajumys ♬ orıgınalnyı zvýk - symbat.galymbekuly
Nurgúl Janǵabylovanyń sózinshe, dárigerler onyń mıy shaıqalǵanyn jáne quıymshaq tusynan qatty jaraqattanǵanyn anyqtaǵan. Aýrýhanada emdelip shyqqannan keıin ol muǵalimderdiń birneshe ret pedagogtik qyzmetine qatysy joq sharýashylyq jumystarǵa tartylǵanyn málimdedi. Sondaı-aq tapsyrma bergen basshylardy jaýapkershilikke tartýdy talap etti.
Shymkent qalasynyń bilim basqarmasy pedagogtiń ótinishi negizinde mektep dırektoryna qatysty qyzmettik tekserý júrgizilip jatqanyn habarlady.
— QR «Pedagog mártebesi týraly» zańynyń 6-baby 2-tarmaǵynyń 1 tarmaqshasyna sáıkes, zańnamada kózdelgen jaǵdaılardy qospaǵanda, pedagogterdi kásibı mindetterine qatysy joq jumystarǵa tartýǵa jol berilmeıdi. Olarǵa aýmaqty tazalaý, abattandyrý jáne laýazymdyq ári kásibı mindetterine qatysy joq basqa da qoǵamdyq jumystardy júkteýge bolmaıdy. N. Janǵabylovanyń ótinishi boıynsha mektep dırektoryna qatysty eńbek qaýipsizdigi talaptarynyń saqtalýyn qamtamasyz etpeý faktisi boıynsha qyzmettik tekserý júrgizilip jatyr, — dep habarlady vedomstvo.
Sonymen qatar dırektordyń orynbasary T. Kúzúmbaeva qyzmetkerlerge eńbek qaýipsizdigi talaptaryn túsindirý jumystary jetkiliksiz júrgizilgeni úshin tártiptik jaýapkershilikke tartyldy.
Bilim basqarmasynyń málimetinshe, mektepke materıaldyq-tehnıkalyq bazany qamtamasyz etýge jáne qajetti jumystardy júrgizýge bıýdjet qarajaty bólingen. Atalǵan qarajat zańnama talaptaryna sáıkes maqsatty túrde paıdalanylýy tıis.
Emdelip shyqqannan keıin Nurgúl Janǵabylova mekteptegi jumysyna qaıta oraldy.
Buǵan deıin Almatydaǵy mektepterdiń birinde pedagog kabınet tazalap jatqan vıdeo jarııalanǵannan keıin tekserý bastalǵan bolatyn. Muǵalim ózine jáne basqa pedagogterge kásibı mindetterine qatysy joq jumystardyń júkteletinin aıtqan.
