Shymkentte mektep oqýshysyn qaǵyp óltirgen júrgizýshi qamaýǵa alyndy
Shymkentte mektep oqýshysyn qaǵyp ketken júrgizýshi qamaýǵa alyndy, dep habarlaıdy Kazinform agenttigi.
7 qazan keshki saǵat 18:45 shamasynda Arǵynbekov kóshesiniń boıynda BMW-530 avtokóliginiń júrgizýshisi kámeletke tolmaǵan jaıaý júrginshini qaǵyp ketti. Saldarynan 9 jasar bala oqıǵa ornynda qaıtys boldy.
Іstiń mán-jaıyn anyqtaýǵa Shymkent qalasy PD-nyń anyqtaýshylary men krımınalısteri bardy. Jol-patrýldik polıtsııa qyzmetkerleri oqıǵa ornyn qorshaýǵa aldy.
«Polıtseıler atalǵan jaıtty QR QK-niń 345-baby 3-bóligi (Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn abaısyzda adam ólimine ákep soqqan buzýy) boıynsha tirkeldi. Anyqtaýshylar qajetti saraptamalardy taǵaıyndady. Júrgizýshi ýaqytsha ustaý ızolıatoryna qamaýǵa alyndy. Qazirgi tańda sotqa deıingi tergeý amaldary júrgizilip jatyr», - dedi polıtsııadan.
Aldaǵy ýaqytta is sotqa joldanady. Polıtsııa qyzmetkerleri qaıǵyly oqıǵany boldyrmaý úshin jol erejelerin qatań saqtaýdy suraıdy.
