Shymkentte mektep býhgalteri 13 mln teńgeden astam qarjyny jymqyrǵany úshin eki jylǵa sottaldy

ASTANA. KAZINFORM — Shymkent qalasyndaǵy №43 mekteptiń bas býhgalteri Aıdana Mekemtas memleket qarajatyn jymqyrǵany úshin eki jylǵa bas bostandyǵynan aıyryldy. Bul týraly Kazinform agenttiginiń tilshisi habarlaıdy.

Sot málimetinshe, 27 jastaǵy Mekemtas 2022 jyldyń qańtarynan 2024 jyldyń tamyzyna deıin mekteptiń elektrondy tsıfrlyq qoltańbasyn paıdalanyp, 15 muǵalimniń jalaqysyn júıeli túrde artyq eseptegen. Keıin bul soma artyq aýdarylyp ketkenin aıtyp, pedagogtardan qarajatty qaıtarýdy suraǵan. Alaıda aqsha mektep bıýdjetin emes, óziniń jeke shotyn tolyqtyryp otyrǵan.

Sonymen qatar, mektepke qajetti zattardy satyp alýǵa bólingen qarjyny jeke kásipkerdiń shotyna aýdaryp, sońynan ózi ıemdengeni anyqtaldy. Jalpy keltirilgen shyǵyn 13 mıllıon teńgeden asty.

Aıyptalýshy kinásin tolyq moıyndap, ókinish bildirdi jáne shyǵyndy memleketke tolyq ótedi.

Sot ony Qylmystyq kodekstiń 189-baby, 3-bóligi, 1 jáne 2-tarmaqtary boıynsha — «Senip tapsyrylǵan bóten múlikti ıemdený nemese ysyrap etý» babymen kináli dep tanydy.

— Aıdana Mekemtasty kináli dep tanyp, eki jylǵa bas bostandyǵynan aıyrý jazasy taǵaıyndaldy, sondaı-aq ómir boıy memlekettik jáne jergilikti basqarý organdarynda, Ulttyq bank pen oǵan qarasty uıymdarda, kvazımemlekettik sektorda qyzmet atqarý quqyǵynan aıyryldy, — delingen sot úkiminde.

Jábirlenýshi tarap retinde qalalyq bilim basqarmasy tanyldy. Úkim jarııalanǵan soń sottalýshy zalda qamaýǵa alyndy. Sot sheshimi zańdy kúshine endi.

Eske sala keteıik, buǵan deıin Shymkentte mektep dırektory men bas býhgalter 71 mıllıon teńgeni jymqyrǵany úshin segiz jylǵa sottalǵan edi.