Shymkentte mektep basshylyǵy býhgaltermen birge 48 mln teńge jymqyrǵan

ShYMKENT. KAZINFORM. Shymkentte №44 orta mektep dırektory jáne onyń orynbasary, bilim mekemesiniń býhgalteri sottaldy. Olarǵa pedagogterdiń eńbegine aqy tóleý qoryna bólingen 48 mln teńge kólemindegi bıýdjet qarajatyn jymqyrdy degen aıyp taǵyldy.

Úkim Shymkent qalasynyń qylmystyq ister jónindegi mamandandyrylǵan aýdanaralyq sotynda oqyldy. 

Sybaılas jemqorlyqqa qarsy is-qımyl agenttiginiń Shymkent qalasy boıynsha departamenti málim etkendeı, sot úkimimen belgilengen normatıvten tys jalaqyny zańsyz aýdarǵany, sondaı-aq «óli jandarǵa» júıeli tólem jasap kelgeni úshin dırektor orynbasary men mektep býhgalteri 7 jáne 8 jylǵa bas bostandyǵynan aıyrylǵan. 

Al jumysyna salǵyrt qaraǵan mektep dırektoryna 6,9 mln teńge aıyppul salyndy. 

Úkim zańdy kúshine engen joq.

Aıta keteıik, sybaılas jemqorlyqtyń aldyn alý maqsatynda sot protsesine qalalyq mektep dırektorlary men býhgalterleri, jalpy sany 50 adam offlaın, 650-den astam onlaın qatysty. 

Biz buǵan deıin Qyzylorda oblysy Jańaqorǵan aýdandyq bilim bóliminiń basshysy men 24 mekteptiń býhgalteri iri kólemde qarjy jymqyrǵany úshin sottalǵanyn jazǵan bolatynbyz. 

Naýryz aıynda májilismen Bolatbek Najmetdınuly Premer-mınıstrdiń orynbasaryna joldaǵan depýtattyq saýalynda bilim berý uıymdaryndaǵy býhgalterlik esep júıesin qaıta qaraý keregin atap ótken edi.