Shymkentte mefedron saqtaǵan er adamǵa qatysty úkim qaıta qaralady
ASTANA. KAZINFORM — Túrkistan oblysynyń turǵyny asa iri mólsherdegi psıhotroptyq zattardy zańsyz saqtap, tasymaldaǵany úshin sottalǵanymen, onyń is-áreketi durys saralanbaǵany anyqtaldy, dep habarlaıdy Bas prokýratýranyń baspasóz qyzmeti.
Shymkent qalasynyń qylmystyq ister jónindegi mamandandyrylǵan aýdanaralyq sotynyń úkimimen er adam 200 gramm mefedrondy ótkizý maqsatynsyz zańsyz ıemdenip, saqtap jáne tasymaldaǵany úshin kináli dep tanylyp, 3 jylǵa bas bostandyǵynan aıyrylǵan.
— Alaıda sot aktisiniń zańdylyǵyn tekserý barysynda sottalǵannyń áreketinde Qylmystyq kodekstiń 297-baby 3-bóliginiń 1), 3) tarmaqtarynda kózdelgen qylmys belgileri bar ekeni anyqtalǵan. Atap aıtqanda, ol psıhotroptyq zattardy adamdar tobynyń aldyn ala sóz baılasýymen, asa iri mólsherde ótkizý maqsatynda zańsyz ıemdenip, saqtap jáne tasymaldaǵan dep kórsetilgen. Osyǵan baılanysty Bas prokýratýra kassatsııalyq narazylyq engizip, nátıjesinde sot úkiminiń kúshi joıyldy. Qylmystyq is jańadan sot qaraýyna jiberildi, — delingen habarlamada.
Aıta keteıik, atalǵan bap boıynsha kináli dep tanylǵandarǵa múlki tárkilenip, 7 jyldan 12 jylǵa deıin bas bostandyǵynan aıyrý jazasy qarastyrylǵan.
Budan buryn Aqtaýda sheteldik 1 kelige jýyq apıyndy jutyp, elge ótkizbek bolǵanyn jazǵan edik.
