Shymkentte medıtsınalyq kolledjge bólingen bıýdjet qarajaty bes jyl boıy zańsyz ıemdelingen
ShYMKENT. KAZINFORM — Shymkent qalasy boıynsha Іshki memlekettik aýdıt departamenti «Ońtústik Qazaqstan joǵary medıtsınalyq kolledji» jaýapkershiligi shekteýli seriktestiginde ishki aýdıt júrgizdi. Tekserý qorytyndysy boıynsha jalpy somasy 204,1 mln teńge kóleminde qarjylyq buzýshylyqtar anyqtaldy, olardy memlekettik bıýdjetke óteý qajet. Atalǵan somanyń ishinde aýdıt barysynda 3,0 mln teńge óndirip alyndy.
Tekserý barysynda 2021–2025 jyldary Kolledjde zańnama talaptaryn buza otyryp, bilim alýshylardyń tamaqtaný, turý jáne oqý ádebıetin satyp alý shyǵyndaryn ishinara óteýge bólingen bıýdjet qarajaty zańsyz ıemdenilgeni anyqtaldy. Zańsyz ıemdenýdiń jalpy somasy 203,1 mln teńgeni qurap, ol 286 stýdentke qatysty boldy.
Atap aıtqanda:
• 2021 jyly — 71 stýdentke arnalǵan 11,9 mln teńge;
• 2022 jyly — 160 stýdentke arnalǵan 19,1 mln teńge;
• 2023 jyly — 235 stýdentke arnalǵan 43,8 mln teńge;
• 2024 jyly — 210 stýdentke arnalǵan 78,3 mln teńge;
• 2025 jyldyń alǵashqy alty aıynda — 206 stýdentke arnalǵan 50 mln teńge.
— Alty jaǵdaıda jalpy somasy 310,2 myń teńge mólsherinde memlekettik stıpendııalardy artyq tóleý faktileri, sondaı-aq eki jaǵdaıda 712,0 myń teńge kóleminde memlekettik bilim berý tapsyrysy boıynsha artyq aýdarymdar anyqtaldy. Aýdıt qorytyndysy boıynsha anyqtalǵan zańbuzýshylyqtardy joıý jáne osy buzýshylyqtarǵa jol bergen laýazymdy tulǵalardy jaýapkershilikke tartý máselesin qaraý jóninde nusqama berildi, — delingen, Qazaqstan Respýblıkasy Qarjy mınıstrliginiń Іshki memlekettik aýdıt komıteti taraıqan aqparatta.
Aıta keteıik, budan buryn Shymkentte jol erejesin buzǵan depýtat bir jylǵa júrgizýshi kýáliginen aıyrylǵanyn jazǵan bolatynbyz.