Shymkentte marafonǵa baılanysty birneshe kóshe jabylady
ShYMKENT. KAZINFORM — Shymkentte 12 sáýir kúni marafon ótedi. Іs-sharany ótkizý kezinde kóshelerdiń bir bóligi jabylady. Bul týraly qala ákimdigi habarlady.
Shymkent Half Marathon ótkizilýine baılanysty Shymkentte 12 sáýir kúni saǵat 05:00–den 15:00–ge deıin birqatar kóshe jabylyp, qoǵamdyq kólikterdiń qozǵalysyna ózgerister engiziledi.
Ýaqytsha shekteýlerge baılanysty birneshe avtobýs baǵyty tómende kórsetilgen kóshelermen júrmeıdi:
№ 52 baǵyt (Túrkııa, Alataý batyr kósheleri);
№ 9 baǵyt (Jeıhýn, Jantóre kósheleri);
№ 3 baǵyt (Ábilhaıyr han, Q.Jalaıyrı, Túrkııa kósheleri);
№ 108 baǵyt (Túrkııa, Seıhýn kósheleri);
№ 150 jáne 126 baǵyttar (Q.Jalaıyrı, Túrkııa kósheleri).
Qala ákimdigi turǵyndar men júrgizýshilerge jol qozǵalysyn aldyn ala josparlap, ýaqytsha qolaısyzdyqtarǵa túsinistikpen qaraýdy suraıdy.
Qalalyq ishki saıasat basqarmasynyń málimetinshe, marafon «Shymsıtı» shaǵynaýdanynda tańǵy saǵat 06:30–da bastalady. Jarysqa qatysýshylar 5, 10 jáne 21,1 shaqyrym qashyqtyqtarda synǵa túsedi. Sporttyq is-sharaǵa 3 myńǵa jýyq adam qatysady dep josparlanyp otyr.
Budan buryn Astana ortalyǵynda jylyna neshe marafon ótkizýge ruqsat beriletinin jazǵan edik.
