Shymkentte Mádenıet jáne óner ýnıversıteti qurylyp, jańa Opera jáne balet teatry salynady
ShYMKENT. KAZINFORM – Búgin Shymkentte Premer-mınıstrdiń orynbasary — Mádenıet jáne aqparat mınıstri Aıda Balaevanyń tóraǵalyǵymen Mádenıet jáne óner ýnıversıtetin qurý máseleleri jóninde keńes ótti.
Atalǵan joba Memleket basshysy Qasym-Jomart Toqaevtyń megapolıske jumys sapary barysynda Mádenıet jáne aqparat mınıstrligi men Shymkent qalasynyń ákimdigine bergen tapsyrmasy aıasynda júzege asyrylmaq.
Keńes jumysyna Shymkent qalasynyń ákimi Ǵabıt Syzdyqbekov, Mádenıet jáne aqparat mınıstrliginiń, jergilikti atqarýshy organdardyń, merdiger uıymdardyń ókilderi, sondaı-aq M. Áýezov atyndaǵy Ońtústik Qazaqstan zertteý ýnıversıtetiniń basshylyǵy qatysty.
Jıyn barysynda Aıda Balaeva qatysýshylardyń aýqymdy jobany iske asyrý barysy jónindegi baıandamalaryn tyńdady.
Jańa joǵary oqý orny M. Áýezov atyndaǵy Ońtústik Qazaqstan zertteý ýnıversıtetiniń Mádenıet jáne óner fakýltetiniń bazasynda qurylady. Josparǵa sáıkes oqý ornynda 6 fakýltet, 17 kafedra jáne bakalavrıat, magıstratýra men doktorantýra boıynsha 46 bilim berý baǵdarlamasy jumys isteıtin bolady.
Negizgi basymdyq kıno jáne televıdenıe, anımatsııa, medıa-menedjment, tsıfrlyq dızaın, stsenografııa jáne ózge de baǵyttar boıynsha tehnıkalyq kadrlar daıarlaýǵa beriledi.
Sonymen qatar Qazaqstanda alǵash ret tsırk óneri salasy boıynsha joǵary bilimdi mamandar daıarlaý josparlanyp otyr. Sondaı-aq restavratorlar daıarlaý da jańa baǵyttardyń biri bolmaq.
Kezdesýde Shymkent qalasynda jańa Opera jáne balet teatryn salý máselesi de qaraldy. Bul nysan boıynsha qala ákimdigi jalpy aýmaǵy 2,8 gektardy quraıtyn jer ýchaskesin belgilep qoıǵan. Jobaǵa sáıkes teatrdyń kórermen zaly 1500 orynǵa laıyqtalyp salynady.
Qazirgi ýaqytta qalada 1984 jyly salynǵan, 330 kórermenge arnalǵan Opera jáne balet teatry jumys istep tur.
Aıta ketelik Emınem men Shakıra Almatyda óner kórsetýi múmkin ekenin jazǵan edik.
