Shymkentte lazerlik shoý kórsetildi
ShYMKENT. KAZINFORM - Búgin Shymkenttiń ortalyq alańy mereke patshalyǵyna aınaldy. Jańa jyl qarsańynda qala ákimdigi uıymdastyrǵan «OPEN AIR SHYMKENT FEST – 2024» festıvali qala turǵyndary men qonaqtary úshin naǵyz syı boldy.
Mereke tús qaıta jármeńkemen bastaldy. Onda qala turǵyndary men qonaqtary shyǵarmashylyq sala ókilderiniń úzdik týyndylaryn tamashalady. Sondaı-aq, alańda kólikter kórmesi ótti.
Keshkisin kórsetilgen lazerlik shoý kópshilikti tańqaldyrdy. Ákimdik ǵımaratynyń qasbetinde bılegen sáýleler qalanyń jetistikteri men tarıhynan syr shertti. Mundaı sharany ońtústik megapolıs elimizde birinshi bolyp ótkizip otyr.
Keshtiń eń basty oqıǵasy – bas shyrsha shamdarynyń janýy boldy.
Qala ákimi Ǵabıt Syzdyqbekov «Astana» alańynda qala turǵyndarymen birge basty shyrshanyń shamyn jaǵý rásimine qatysty. Merekelik kontsert barysynda 50 Aıaz ata men 50 Aqshaqardyń kostıýmdik sherýi ótti.
Arnaıy bezendirilgen Coca-Cola jańa jyldyq korteji qalanyń ortalyq kóshelerimen júrip ótip, kópshilikke qysqy ertegidegi merekelik kóńil kúı syılady.
Іs-shara qazaq estrada juldyzdarynyń qatysýymen ótken kontsertke ulasyp, sońy otshashýmen aıaqtaldy.
Bıyl qalada merekelik bezendirý jumystary aıasynda jańajyldyq shyrshalar Shymkenttiń bes aýdanyndaǵy birneshe orynǵa qoıyldy.
Atap aıtar bolsaq, Turan aýdanynda – Abaı saıabaǵynda. Ál-Farabı aýdanynda – «Ál-Farabı» alańynda. Eńbekshi aýdanynda – «Qazaqstan-Túrkııa dostyǵy» saıabaǵynda. Abaı aýdanynda – «Asar» shaǵynaýdanyndaǵy alleıada, sondaı-aq áýejaı aýmaǵynda ornatyldy.
Aıta keteıik, budan buryn Shymkentte jańa qosylǵan shyrsha órtenip kete jazdaǵanyn jazǵan bolatynbyz.
