Shymkentte kúıeýin pyshaqtap óltirdi degen kúdikpen áıel ustaldy
ShYMKENT. KAZINFORM — Shymkentte otbasylyq janjal adam ólimimen aıaqtaldy. Er adam pyshaq jaraqatynan kóz jumdy. Qazir polıtsııa bul fakti boıynsha sotqa deıingi tergeý júrgizip jatyr.
Qaıǵyly oqıǵa «Samal-3» shaǵynaýdanynda bolǵan. Erli-zaıyptylar osy shaǵynaýdandaǵy páterlerdiń birin jaldap turǵan. Aldyn ala málimet boıynsha, 24 qyrkúıekte er adam men áıel arasynda otbasylyq-turmystyq janjal týyndap, nátıjesinde er adam pyshaq jaraqatyn alǵan.
— Atalǵan jaıt boıynsha áıel ustalyp, ýaqytsha ustaý ızolıatoryna qamaldy. Qazirgi ýaqytta oqıǵanyń barlyq mán-jaıyn anyqtaýǵa baǵyttalǵan qajetti tergeý áreketteri júrgizilip jatyr, — dep habarlady Shymkent qalasynyń polıtsııa departamenti.
Polıtsııa ózge aqparattyń QR QPK-niń 201-babyna sáıkes tergeý múddesinde jarııa etýge jatpaıtynyn málimdedi.
Buǵan deıin Shymkentte áıelin aıaýsyz uryp-soqqan er adam ustalǵanyn jazǵan edik.
