Shymkentte qurylys basqarmasy basshysynyń burynǵy orynbasary 7,5 jylǵa sottaldy
ShYMKENT. KAZINFORM-Shymkent qalasynda qurylys basqarmasy basshysynyń eks-orynbasary Serik Kúsherbekov 83 mln teńgeden astam bıýdjet qarjysyn jymqyrǵany jáne zańdastyrǵany úshin 7,5 jylǵa bas bostandyǵynan aıyryldy.
Tergeý málimetinshe, 2023–2024 jyldar aralyǵynda «Turǵyn úı Shymkent» JShS dırektorynyń orynbasary bolyp turǵan kezinde Serik Kúsherbekov konkýrs ótkizbesten óziniń sybaılasy Baǵlan Pernebek basqaratyn «Shanyrak Stroy Invest» JShS-men kelisimshart jasaǵan. Jańa merdigermen shart aldyńǵy oryndaýshy — «PMK-7 LTD» JShS-pen jasalǵan kelisimdi birjaqty buzǵannan keıin rásimdelgen. Nátıjesinde jumystyń quny 172 mıllıon teńgege deıin, al kólemi 78 úıge deıin ulǵaıǵan.
Keıin dál osyndaı shema 43 kópqabatty turǵyn úıge tehnıkalyq tekserý jáne energııa aýdıtin júrgizý barysynda da qoldanylǵan. Aldymen kórsetilgen qyzmetter úshin saraptamalyq uıymǵa 6,45 mıllıon teńge tólengen. Alaıda keıinirek Serik Kúsherbekovtiń nusqaýymen, jańa kelisimsharttarsyz sol jumys úshin «Shanyrak Stroy Invest» kompanııasyna 88,7 mıllıon teńge aýdarylǵan.
Shemaǵa resmı túrde jumyssyz retinde tirkelgen Abylaıhan Dúısenbaev ta qatysqan. Ol Qytaıdan qymbat sporttyq elektromobıl satyp alý arqyly zańsyz tabysty zańdastyrýǵa kómektesken.
Serik Kúsherbekov 2024 jyldyń sáýirinde Shymkent qalalyq qurylys basqarmasy basshysynyń orynbasary qyzmetine taǵaıyndalǵan. Alaıda sol jyldyń jeltoqsan aıynda ustalyp, qamaýǵa alynǵan. Kóp uzamaı onyń sybaılastary da tergeýge alyndy.
Shymkenttiń aýdanaralyq qylmystyq sotynyń úkimimen Serik Kúsherbekov 7,5 jylǵa bas bostandyǵynan aıyryldy. Onyń sybaılastary — Baǵlan Pernebek pen Abylaıhan Dúısenbaev árqaısysy 7 jylǵa sottaldy. Sot úsheýin de bir aı ishinde 88,74 mıllıon teńge kólemindegi keltirilgen zalaldy óteýge mindettedi. Zańsyz tabysqa alynǵan kólik memleket menshigine tárkilenedi.
Sottalǵandar úkimge apellıatsııalyq tártippen shaǵymdana alady.
Aıta keteıik, budan buryn Shymkentte psıhıkalyq ortalyqta emdelýshilerdi zorlaǵandar 15 jylǵa sottalǵanyn jazǵan bolatynbyz.