Shymkentte qurylys alańynda jumysshy qaza tapty

ShYMKENT. KAZINFORM — Qaıǵyly oqıǵa turǵyn úı kesheniniń qurylysy júrip jatqan aýmaqta bolǵan. 

Resmı málimetterge súıensek, marqum Úmitjan Baltabaev abaısyzda lıft shahtasyna qulap ketken. Qaladaǵy Eńbek ınspektsııasy oqıǵanyń «Aina Mare House» JShS-niń qurylys alańynda bolǵany naqtylady.

— Úmitjan Baltabaev belgisiz jaǵdaıda qulap, kóz jumdy. Tergeýdi bastaý úshin jumys berýshiden bir táýlik ishinde resmı habarlama túsýi tıis. Sonyń negizinde arnaıy komıssııa qurylyp, on jumys kúni ishinde tekserý júrgiziledi, — dep málimdedi vedomstvo ókilderi.

Alaıda búgingi kúnge deıin eńbek ınspektsııasyna eshqandaı resmı habarlama túspegen. Sondaı-aq marqumnyń atalǵan nysanda resmı túrde jumys istegen-istemegeni áli anyqtalyp jatyr.

Polıtsııa departamenti qaıǵyly oqıǵaǵa baılanysty qylmystyq is qozǵalǵanyn rastady.

— Qazirgi tańda bolǵan jaǵdaıdyń barlyq mán-jaıyn anyqtaý úshin keshendi tergeý amaldary júrgizilip jatyr. Tergeý qorytyndysy boıynsha protsessýaldyq sheshim qabyldanady, — dep habarlady Shymkent qalalyq polıtsııa departamenti.

Al atalǵan qurylys nysanyna jaýapty kompanııa ázirge resmı túsinikteme bergen joq.

Aıta keteıik, budan buryn Berdenov isi boıynsha eki tarap ta apellıatsııaǵa shaǵym túsirgenin jazǵan bolatynbyz.