Shymkentte kúresten Qazaqstan chempıony zaýytta tok soǵyp, kóz jumdy
ShYMKENT. KAZINFORM – Estý qabileti buzylǵan sportshylar arasynda kúresten Qazaqstan chempıony bolǵan 28 jastaǵy Ádil Tilektes Shymkenttegi kásiporyndardyń birinde jumys kezinde qaza tapty. Polıtsııa sotqa deıingi tergeýdi bastady.
Marqumnyń dosy áleýmettik jelide taratqan aqparatqa sáıkes, Ádil Tilektes keramıkalyq plıtka óndiretin zaýytta jumys istegen. Jumys barysynda ol abaısyzda elektr symyna tıip ketip, toq soqqannan keıin bıikten qulaǵan. Oqıǵa ornyna kelgen medıtsına qyzmetkerleri onyń ómirin saqtap qala almady.
Shymkent qalasy Polıtsııa departamenti Kazinform saýalyna bergen jaýabynda oqıǵanyń 12 qyrkúıekte bolǵanyn málimdedi.
– Qaladaǵy kásiporyndardyń biriniń aýmaǵynda jumysshynyń qaza bolýyna baılanysty polıtsııa sotqa deıingi tergeý júrgizip jatyr. Aldyn ala málimet boıynsha, er adam jumys barysynda elektr togyna túsip, jaraqaty saldarynan qaza bolǵan. Qazirgi ýaqytta oqıǵanyń barlyq mán-jaıyn anyqtaýǵa baǵyttalǵan qajetti tergeý áreketteri júrgizilip jatyr. QR QPK-niń 201-babyna sáıkes, tergeý múddesine baılanysty ózge málimetter jarııa etilmeıdi, – dep habarlady Shymkent qalasy polıtsııa departamenti.
Ádil Tilektes 1998 jyly dúnıege kelgen. Ol erkin jáne grek-rım kúresimen aınalysyp, estý qabileti buzylǵan sportshylar arasyndaǵy jarystarǵa qatysqan.
2018 jyly Aqtóbede ótken Qazaqstan Respýblıkasynyń II Spartakıadasynda 55 kelige deıingi salmaqta grek-rım kúresinen chempıon atandy. 2019 jyly Qostanaıda eresekter arasyndaǵy komandalyq el chempıonatynda 60 kelige deıingi salmaqta birinshi oryn aldy. Sportshy respýblıkalyq jáne halyqaralyq jarystarda birneshe ret júldeger atanǵan.
Ádil Tilektestiń artynda jubaıy men eki balasy qaldy.
Buǵan deıin Oralda tok soqqan 10 jastaǵy bala kóz jumǵanyn jazǵan edik.
