Shymkentte Qurban aıtqa arnalǵan mal soıý oryndary belgili boldy
ShYMKENT. KAZINFORM — Shymkent qalasynda 27-29 mamyr aralyǵynda qurbandyq shalýǵa ruqsat etilgen úsh mal soıý orny jumys isteıdi.
Qala ákimdiginiń málimetine súıensek, qala aýmaǵynda tamaq qaýipsizdigin qamtamasyz etý maqsatynda tórt túlik maldy zańsyz (qujatsyz, tirkeýsiz), sondaı-aq avtokólikterde jáne jeke turǵyn úılerdiń aýlalarynda satýǵa jáne soıýǵa jol berilmeıdi.
Sonymen qatar qurbandyqqa shalynǵan maldyń etin muqtaj azamattarǵa taratý kezinde veterınarııalyq-sanıtarııalyq talaptar qatań saqtalýy tıis. Atap aıtqanda tońazytqysh jabdyqtardyń bolýy, jeke qorǵanysh quraldaryn paıdalaný jáne sanıtarlyq talaptardy saqtaý mindetti.
— Qala turǵyndary men qonaqtarynan qurbandyq shalý barysynda qaýipsizdik sharalaryn saqtap, maldy tek veterınarııalyq qujattary bar arnaıy mal soıý oryndaryna ótkizýdi suraımyz, — delingen vedomstvo taratqan aqparatta.
Bıyl Shymkent qalasynda veterınarııalyq jáne sanıtarııalyq talaptarǵa saı keletin úsh arnaıy oryn belgilendi.
1. «Kz Meat Farm» ShQ, Qarataý aýdany, Bozaryq 3 t/a, № 1989 ýchaske;
2. «Qazyǵurt BRB» AÓK, Eńbekshi aýdany, Qapal batyr kóshesi, № 12/1 úı;
3. «Báıterek Agro» JShS, Qarataý aýdany, Saıram turǵyn alaby, Mahmut ata kóshesi, № 72 ýchaske.
Budan buryn Jetisý oblysynda Qurban aıtqa arnalǵan 17 arnaıy oryn belgilengenin jazǵan edik.
