Shymkentte Qurban aıt merekesine oraı mal soıýǵa arnalǵan resmı oryndar belgilendi
ShYMKENT. KAZINFORM – 6–8 maýsym aralyǵynda qalada veterınarııalyq-sanıtarııalyq talaptarǵa saı tórt mal soıý pýnkti jumys isteıdi.
Shymkent qalasy boıynsha Aýyl sharýashylyǵy mınıstrliginiń veterınarııalyq baqylaý jáne qadaǵalaý komıtetiniń aýmaqtyq ınspektsııasy adam men janýarǵa ortaq asa qaýipti aýrýlardyń taralýyn boldyrmaý úshin usynystar berdi.
Veterınarııalyq ınspektorlar halyqty qorǵaý jáne qaýipsizdikti qamtamasyz etý maqsatynda tómendegi veterınarııalyq-sanıtarııalyq erejeler men talaptardy qatań saqtaý qajet ekenin atap ótti.
– Qurbandyqqa shalynatyn janýardy sáıkestendirý, ıaǵnı qulaq japsyrmasynyń (bırka) bolýy jáne onyń tirkelýi;
– Tiri janýarlarǵa arnalǵan № 1 nysandaǵy veterınarııalyq anyqtamanyń bolýy;
– Qurbandyqqa shalynatyn janýarlardy soıý tek arnaıy belgilengen soıý beketterinde (alańdarda) júrgizilýi tıis;
– Soıylǵan janýar etin (balalar úılerine, balabaqshalarǵa, aýrýhanalarǵa, meshitterge jáne t.b.) taratý kezinde № 2 nysandaǵy veterınarııalyq anyqtamanyń bolýy jáne tasymaldaý kezinde temperatýralyq rejımniń saqtalýy mindetti.
Bıyl Shymkent qalasynda veterınarııalyq jáne sanıtarııalyq talaptarǵa saı keletin tórt arnaıy oryn belgilendi.
1. «Zamın» JShS (Qarataý aýdany, «Saıram» turǵyn alaby, A. Temýr kóshesi, n/j);
2. «Halal Qassab» JShS (Qarataý aýdany, «Bozaryq» turǵyn alaby, 3, № 1989 telim);
3. «Báıterek Agro» JShS (Qarataý aýdany, «Saıram» turǵyn alaby, Mahmut ata kóshesi, № 72 telim);
4. «Qazyǵurt-BRB» ÁKK (Eńbekshi aýdany, Qapal batyr kóshesi, Óndiristik, 31/1).
– Qurmetti turǵyndar! Joǵaryda atalǵan veterınarııalyq-sanıtarııalyq erejeler men talaptardy qatań saqtaýlaryńyzdy, qalanyń epızootııalyq turaqtylyǵyn qamtamasyz etýlerińizdi, óz densaýlyǵyńyzdyń qaýipsizdigin saqtap, barlyq qajetti saqtyq sharalaryn qabyldaýlaryńyzdy suraımyz. Nıetterińiz qabyl bolsyn, - delingen mamandar usynǵan aqparatta.
Aıta keteıik, budan buryn Shymkentte polıtsııa qyzmetkeri moped júrgizýshisine tas laqtyrǵanyn jazǵan bolatynbyz.