Shymkentte quny 6 mln teńgeden asatyn mı operatsııasy tegin jasaldy
ASTANA. KAZINFORM — Shymkenttegi № 2 qalalyq aýrýhanada joǵary tehnologııalyq neırohırýrgııalyq operatsııalar patsıentterge tegin jasalyp jatyr. Jaqynda 38 jastaǵy áıelge mı tamyrynyń anevrızmasyna baılanysty kúrdeli endovaskýlıarlyq operatsııa jasaldy.
Shymkent ákimdiginiń habarlaýynsha, 38 jastaǵy patsıent uzaq ýaqyt boıy basynyń qatty aýyrǵanyna shaǵymdanǵan. MRT tekserýinen keıin dárigerler onyń mı tamyrynda anevrızma bar ekenin anyqtaǵan.
Mamandar naýqasqa ashyq operatsııa jasaýdyń ornyna zamanaýı endovaskýlıarlyq ádisti tańdaǵan. Bul tásil kezinde qan tamyry arqyly arnaıy qural engizilip, anevrızma ornalasqan jerge stent qoıylady.
Operatsııany neırohırýrg Erkin Medetov jasaǵan. Qazir naýqastyń jaǵdaıy turaqty, ol dárigerlerdiń baqylaýynda.
Mundaı operatsııanyń quny 6 mln teńgeden asady. Alaıda patsıentke qajetti medıtsınalyq kórsetilim bolǵandyqtan, joǵary tehnologııalyq medıtsınalyq kómek aıasynda operatsııa tegin jasalǵan.
Mamandardyń aıtýynsha, medıtsınalyq kórsetilim bolǵan jaǵdaıda osyndaı kúrdeli neırohırýrgııalyq operatsııalar patsıentterge tegin kórsetiledi.
Eske salaıyq, buǵan deıin Almatyda quny 5 mln teńgege jýyq omyrtqaǵa jasalatyn operatsııalar tegin bolatynyn jazǵanbyz.
