Shymkentte quny 1 mlrd teńgeden asatyn áskerı maqsattaǵy jer memleketke qaıtaryldy
ASTANA. KAZINFORM – Shymkent garnızonynyń áskerı prokýratýrasy quny 1 mıllıard teńgeden asatyn jer ýchaskesin memleket menshigine qaıtardy.
Qadaǵalaý sharalary barysynda Ulttyq ulannyń áskerı bólimderiniń birine tıesili jalpy aýmaǵy 87 gektardan asatyn jerdiń 1999 jyly zańsyz túrde jeke menshik qurylymdardyń paıdasyna berilgeni anyqtalǵan.
Prokýratýra málimetinshe, keıin bul jer ýchaskesi birneshe ret qaıta satylǵan.
«Áskerı prokýrorlar áskerı múliktiń saqtalýy men maqsatty paıdalanylýyn qamtamasyz etý baǵytyndaǵy jumystardy turaqty túrde júrgizip keledi. Tekserý barysynda qorǵanys maqsatyndaǵy jer ýchaskesiniń zańsyz ıelikten shyǵarylǵany anyqtaldy. Osyǵan baılanysty garnızon prokýratýrasy áskerı bólimmen birlesip, sot tártibimen satyp alý-satý sharttaryn jaramsyz dep taný jumystaryn júrgizdi. Nátıjesinde strategııalyq mańyzy bar jer memleket menshigine qaıtaryldy», – dep habarlady Bas áskerı prokýratýra.
Sot sheshimimen satyp alý-satý mámileleri jaramsyz dep tanylyp, quny 1 mıllıard teńgeden asatyn jer ýchaskesi áskerı vedomstvonyń balansyna berildi.
Vedomstvo ókilderiniń aıtýynsha, áskerı múliktiń saqtalýyn qamtamasyz etý jáne zańsyz ıelikten shyǵarylǵan aktıvterdi qaıtarý baǵytyndaǵy jumystar jalǵasady.
Aıta keteıik, buǵan deıin Mańǵystaýda quny 870 mln teńgelik 50 gektar jer memleket menshigine ótkeni habarlandy.
