Shymkentte qumar oıynǵa áýestengen memqyzmetshiler jumystan bosatylyp jatyr

ShYMKENT. KAZINFORM – Ákimdik qyzmetkerleri lýdomanııaǵa boı aldyrǵan. 

Shymkent qalasy ákiminiń orynbasary, ákimdik apparatynyń resmı ókili Sársen Quranbek qaladaǵy memlekettik qyzmetshiler arasynda lýdomanııaǵa beıim qyzmetkerlerge qatysty qabyldanyp jatqan sharalar jóninde resmı málimdeme jasady.

– Qoldanystaǵy zańnama talaptaryna sáıkes, eger memlekettik qyzmetker bás tigýmen, qumar oıyndarmen aınalyssa, tipti azǵantaı mólsherde qarjy jumsasa da nemese «bireý tigip ber» degen syltaýmen báske aqsha tikse, bul áreket «teris qylyq» dep baǵalanyp, qyzmetinen bosatylady. Bul – zańnyń naqty talaby. Prokýratýra joldaǵan málimet boıynsha kim lýdamanııaǵa qatysy bar dep tanyldy, solardyń barlyǵy jumystan shyǵarylyp jatyr. Bul derbes derekter bolǵandyqtan olardyń atyn ataı almaımyz, - dedi Sársen Quranbek.

Resmı ókildiń aıtýynsha, bul baǵyttaǵy jumystar boıynsha anyqtalǵan árbir faktige sáıkes tıisti sheshim qabyldanady.

– Qumar oıyn – dert. Ondaı adam aqshasymen qosa, úıi men malyn da satýǵa deıin barady. Bul – qoǵam úshin qaýipti jaǵdaı. Biz tek zań aıasynda áreket etemiz, al olar qarajatty qaıdan alǵanyn anyqtaý – quzyrly organdardyń enshisindegi másele, - dedi Sársen Quranbek.

Aıta keteıik, budan buryn Shymkentte 500 adam júrgizýshi kýáligin zańsyz alǵanyn jazǵan bolatynbyz.