Shymkentte kýáliginen aıyrylǵan júrgizýshi avtobýs aıdaǵan
ShYMKENT. KAZINFORM — Shymkentte bir táýlikte 500-den astam quqyqbuzýshylyq anyqtaldy.
Shymkent qalasynda «Tasymaldaýshy» jedel-profılaktıkalyq is-sharasy ótip jatyr.
Qalalyq polıtsııa departamentiniń málimetinshe, is-sharanyń alǵashqy táýliginde 543 ákimshilik quqyq buzýshylyq anyqtaldy.
— Onyń ishinde taksı qyzmetin zańsyz usynýdyń 72 deregi, jolaýshylardy tasymaldaý qaǵıdalaryn buzýdyń 68 faktisi, qaýipsizdik beldigin paıdalanbaýdyń 47 deregi jáne tehnıkalyq talaptarǵa saı kelmeıtin kólik quraldaryn paıdalanýdyń 32 faktisi tirkeldi, — delingen polıtsııanyń málimetinde.
Sonymen qatar № 45 baǵyttaǵy avtobýstyń júrgizýshisi qoǵamdyq kólikti júrgizýshi kýáliginsiz basqarǵany anyqtaldy.
Tekserý barysynda onyń kólik quralyn basqarý quqyǵynan aıyrylǵany belgili boldy. Soǵan qaramastan ol qoǵamdyq kólikti basqarýyn jalǵastyrǵan.
— Atalǵan quqyq buzýshylyq boıynsha zań talaptaryna sáıkes tıisti ákimshilik sharalar qabyldandy, — dep habarlady polıtsııa.
Vedomstvo málimetinshe, jolaýshylar tasymaly salasyndaǵy zańdylyqty qamtamasyz etý maqsatyndaǵy profılaktıkalyq is-sharalar aldaǵy ýaqytta da turaqty túrde jalǵasady.
Buǵan deıin Shymkentte avtobýs júrgizýshisi jeńil kólikti qasaqana qaqqanyn habarlaǵan edik.
