Shymkentte kir jýǵysh untaqtaryn zańsyz jasaýmen aınalysqan tseh anyqtaldy

ASTANA. KAZINFORM – Shymkentte kir jýǵysh untaqtarynyń tanymal brendterin zańsyz jasaýmen aınalysqan jasyryn tseh anyqtaldy. Bul týraly Ádilet mınıstrliginiń resmı ókili Talǵat Ýálı aıtty.

«Osy jyldyń 10 naýryzynda Shymkent qalalyq ádilet departamenti Polıtsııa departamentiniń kómegimen Qarataý aýdanynyń aýmaǵynda belgili brendterdiń jalǵan kir jýǵysh untaqtaryn daıyndaǵan zańsyz tsehty anyqtady. Tekserý barysynda 10 kelilik 102 dana «Ariel AQUA PUDRA» qaptamasyndaǵy kir jýǵysh untaq, 9 kelilik 20 dana «Tide AQUA PUDRA color» qaptamasyndaǵy kir jýǵysh untaq jáne 50 dana «Mıf AQUA PUDRA» oraý materıaly 50 dana tárkilendi. Alynǵan kontrafaktilik ónimniń jalpy salmaǵy 1 tonnadan asty», - dedi resmı ókil.

Onyń dereginshe, «Procter & Gamble» kompanııasynyń taýar belgileriniń quqyq ıesine keltirilgen zalal negizinde azamat M-ge qatysty Ákimshilik quqyq buzýshylyq týraly kodekstiń 158-baby boıynsha is qozǵaldy. Qazirgi ýaqytta ákimshilik is Shymkent qalasynyń ákimshilik quqyq buzýshylyq jónindegi mamandandyrylǵan aýdanaralyq sotynda qaralyp jatyr.

«Jalpy, jyl basynan beri aýmaqtyq ádilet organdary sharýashylyq júrgizýshi sýbektilerdiń qyzmetine ózge taýar belgisin zańsyz paıdalaný faktileri boıynsha 25 tekserý júrgizdi. Onyń ishinde 24 tekserý nátıjeleri boıynsha qoldanystaǵy zańnamany buzýshylyq anyqtaldy. 1 tekserý boıynsha buzýshylyq anyqtalǵan joq. 12 sýbekt ákimshilik jaýapkershilikke tartyldy. Memleket kirisine aıyppul sanktsııalary túrinde 1 121 102 teńge óndirildi. Azamattyq aınalymnan jalpy somasy 55 443 kontrafaktilik ónim alyndy», - dedi Talǵat Ýálı.