Shymkentte kózboıaýshylyqpen qoqys jınaǵandar jumystan bosatyldy

ShYMKENT. KAZINFORM - Sýretke túsý úshin kóshege qoqys shashyp, qaıta jınaǵan úsh adamnyń áreketi kópshiliktiń ashýyn keltirdi. 

Oqıǵa Shymkent qalasynyń Turan aýdanynda boldy. Sýretke túsý maqsatynda eki adam kóshege qoqys shashyp, qaıta jınaǵan. Sondaı-aq, bul áreketterin kósheniń ár aımaǵynda birneshe márte qaıtalaǵan.

Áleýmettik jelide tarap ketken vıdeo kópshiliktiń ashýyn keltirdi. Onda pikir jazýshylardyń bir bóligi tańqalyp, tańdanysyn bildirse, endi bir bóligi kóz boıaýshylyqqa jol bergenderdi jaýapqa tartý kerektigin jazýda. Olardyń ishinde «Ózderi qoqysty laqtyryp, ózderi terip júrgen nesi? Olaı da bola ma? Beti aýlaq kemder?»,

«Bıýdjettiń aqshasyn osylaı jeıdi. Kózboıaýshylyq», «Barlyq jerde kózboıaýshylyq», «Fotootchet. Internetke salynǵan foto vıdeoda shekara joq, biraz eldi sharlaıtyn boldy», - delingen jazbalar bar. 

Al, Turan aýdany ákimdiginiń baspasóz qyzmeti vıdeodaǵy úsh qyzmetker jumystan bosatylǵandyǵyn málimdedi. 

«Kommýnaldy mekeme qyzmetkerleri Temirqazyq kóshesi boıyn qoqystan tazartty. Alaıda atalǵan aýmaqta qyzmetkerler óz taraptarynan qoqys tastap, fotoǵa túsirgen. Qazirgi ýaqytta vıdeodaǵy úsh qyzmetker jumystan bosatyldy. Sondaı-aq jaýapty bólim basshysyna qatań eskertý berildi», - delingen aqparatta.