Shymkentte kóshedegi jappaı tóbeles kezinde pyshaqtalǵan naýqastyń jaǵdaıy aýyr
ShYMKENT. KAZINFORM – Shymkentte 20 qańtar kúni jol ortasynda bolǵan jappaı tóbeles kezinde bir adam qaıtys boldy. Oqıǵaǵa qatysqan bir naýqastyń jaǵdaıy aýyr.
Qalalyq densaýlyq saqtaý basqarmasynyń habarlaýynsha, 1990 jyly týǵan naýqas aýyr jaǵdaıda №1 qalalyq klınıkalyq aýrýhanaǵa jetkizilgen. Dárigerler oǵan barlyq qajetti medıtsınalyq kómekti kórsetip jatyr.
– Naýqasta sol jaq keýde qýysynyń enetin pyshaq-kesilgen jaraqaty anyqtalyp, shuǵyl túrde operatsııalyq em júrgizildi. Qazirgi ýaqytta naýqastyń jaǵdaıy aýyr, jan saqtaý bóliminde em qabyldap jatyr, – dedi qabyldaý bóliminiń meńgerýshisi Talǵat Shaýenov.
Eske salsaq, keshe Erimbetov pen Rysqulov kósheleriniń qıylysynda kólik júrgizýshileri men jolaýshylary arasynda janjal shyǵyp, sońy jappaı tóbeleske ulasqan. Oqıǵa saldarynan 40 jastaǵy er adam pyshaq jaraqatynan kóz jumdy, taǵy bir azamat aýrýhanaǵa jetkizildi. Atalǵan qylmysqa qatysy bar tórt kúdikti er adam anyqtalyp, ustaldy. Oqıǵa boıynsha «adam óltirý», «buzaqylyq» jáne «adamdy urlaý» baptarymen qylmystyq is qozǵaldy.
