Shymkentte kóshi-qon qyzmetiniń burynǵy bastyǵyna sot úkimi shyqty
ShYMKENT. KAZINFORM — Shymkent qalasynyń qylmystyq ister jónindegi mamandandyrylǵan aýdanaralyq soty Polıtsııa departamenti kóshi-qon qyzmeti basqarmasy bastyǵynyń mindetin ýaqytsha atqarýshy bolǵan Jeńis Áýelbekovke qatysty úkim shyǵardy.
Sot Áýelbekovti birneshe ret para alǵany úshin kináli dep tanydy.
— Sot úkimimen Jeńis Áýelbekovke 23 mln 531 myń 200 teńge kóleminde aıyppul jazasy taǵaıyndaldy. Sonymen qatar ol «polıtsııa podpolkovnıgi» arnaıy ataǵynan aıyryldy. Budan bólek ómir boıyna memlekettik qyzmette jáne kvazımemlekettik sektorda laýazym atqarýǵa tyıym salyndy, — delingen sot sheshiminde.
Eske sala keteıik, buǵan deıin áleýmettik jelilerde Shymkentte kóshi-qon qyzmeti basqarmasy bastyǵynyń mindetin ýaqytsha atqarýshy Jeńis Áýelbekovtiń ustalǵany týraly aqparat taraǵan edi.
Kazinform agenttigi UQK-ge resmı saýal joldap, atalǵan aqparatty rastaýdy nemese teriske shyǵarýdy, tergeý barysynyń mán-jaıy jáne Qytaı azamattaryna qujattardy rásimdeýge kómekteskeni úshin 100 myń teńge kóleminde para aldy degen boljamǵa qatysty aqparat berýdi suraǵan.
Sol kezde vedomstvo Qylmystyq-protsestik kodekstiń 201-babyna silteme jasap, istiń egjeı-tegjeıin jarııalaýdan bas tartyp, tek sotqa deıingi tergep-tekserýdiń júrgizilip jatqanyn rastaǵan.
Buǵan deıin Shymkentte departament basshysyna qatysty sotqa deıingi tergeý júrip jatqany týraly habarlaǵan edik.
