Shymkentte kórshiler arasyndaǵy janjaldan bir adam mert boldy
ShYMKENT. KAZINFORM — Shymkentte kórshiler arasyndaǵy janjaldan er adam aýyr jaraqat alyp, kóz jumdy. Oqıǵa beınebaqylaý kamerasyna túsip qalǵan.
Áleýmettik jelide Shymkentte kishkentaı qyzdyń kózinshe er adamnyń zeınetkerdi uryp-soqqany beınelengen vıdeo tarady. Kadrlardan eki er adamnyń janjaldasyp, keıin tóbeleskenin kórýge bolady.
Shymkent polıtsııa departamentiniń málimetinshe, bul derek boıynsha qylmystyq is qozǵaldy.
Aldyn ala málimetke qaraǵanda, jábirlenýshi men onyń kórshisi janjaldasyp qalǵan. Kúdikti er adamǵa birneshe ret soqqy jasaǵan. Dene jaraqattarynyń saldarynan jábirlenýshi oqıǵa ornynda kóz jumdy.
— Densaýlyqqa qasaqana aýyr zııan keltirip, abaısyzda jábirlenýshiniń ólimine ákep soǵý deregi boıynsha polıtsııa sotqa deıingi tergep-tekserýdi bastady. Kúdikti jedel túrde anyqtalyp, ustaldy, — dedi qalalyq polıtsııa departamenti Krımınaldyq polıtsııa basqarmasy bastyǵynyń orynbasary Nurlybek Álibekuly.
Qazirgi ýaqytta oqıǵanyń barlyq mán-jaıyn jan-jaqty ári obektıvti anyqtaýǵa baǵyttalǵan qajetti tergeý áreketteri júrgizilip jatyr. Polıtsııa tergeý múddesine baılanysty ózge aqparattyń jarııa etilmeıtinin habarlady.
Eske salaıyq, buǵan deıin Aqtóbede anasyn óltirip, ájesin jaraqattaǵan oqýshy isi qysqartylǵanyn jazǵan edik.
