Shymkentte kópqabatty úılerdiń birinen 4 adamnyń máıiti tabyldy
ShYMKENT. KAZINFORM – Shymkent qalasynda kópqabatty turǵyn úıdiń birinen tórt adamnyń máıiti tabyldy. Aldyn ala málimetke sáıkes, olar gazdan ýlanǵan bolýy múmkin.
Qaıǵyly jaǵdaı Turan aýdanyndaǵy kópqabatty úılerdiń birinde bolǵan. Olardyń denesi úsh túrli páterden tabylǵan. Tórtinshi qabattaǵy páterlerdiń birinde 1994 jyly týǵan áıel men onyń 2009 jyly týǵan kámeletke tolmaǵan qaıynsińlisi kóz jumǵan. Sol qabattaǵy kórshi páterden 24 jastaǵy jigittiń denesi tabyldy.
Marqumdardyń taǵy biri – úshinshi qabatta páter jaldap turǵan 20 jastaǵy stýdent qyz.
Oqıǵa týraly alǵash bolyp páter ıesi dabyl qaqqan. Ol jalǵa berilgen baspanany tekserýge kelgende jýynatyn bólmeden páter jaldaýshynyń jansyz denesin kórgen. Osydan keıin oqıǵa ornyna jedel qyzmetter shaqyrylǵan.
Turǵyndardyń aıtýynsha, úıdiń kireberisinde gaz ıisi birneshe kún boıy sezilgen. Atalǵan derek boıynsha polıtsııa qylmystyq is qozǵady.
– Qaýipsizdik talaptaryna saı kelmeıtin jumystardy oryndaý nemese qyzmet kórsetý saldarynan abaısyzda adam ólimine ákep soǵý faktisi boıynsha qylmystyq is tirkeldi. Qazirgi ýaqytta qajetti tergeý áreketteri júrgizilip jatyr. Tergeý nátıjesi boıynsha protsessýaldyq sheshim qabyldanady, – dep habarlady Shymkent qalalyq polıtsııa departamenti.
Búgin marqumdar sońǵy saparǵa shyǵaryp salyndy. 32 jastaǵy áıeldiń artynda joldasy men úsh kishkentaı balasy qaldy.
Budan buryn aqpan aıynda Shymkentte jaldamaly páterden bir otbasynyń úsh adamy óli kúıinde tabylǵanyn jazǵan edik.