Shymkentte kontrafaktilik qurylys qospalaryn shyǵaratyn astyrtyn tsehtyń jumysy toqtatyldy
ASTANA. KAZINFORM - Shymkentte iri kólemde kontrafaktilik qurylys qospalaryn shyǵaratyn astyrtyn tsehtyń qyzmeti toqtatyldy. Tekserý barysynda taýar belgileri zańsyz basylǵan 860-tan astam qap kontrafaktilik ónim tárkilendi, dep habarlaıdy QR Ádilet mınıstrliginiń baspasó qyzmeti.
Shymkent qalasynyń Ádilet departamenti Polıtsııa departamenti jáne Ekonomıkalyq tergeý departamentimen birlesip, zańsyz ónim shyǵaratyn astyrtyn tsehtyń qyzmetin toqtatty.
Zańsyz óndiriste «Alina Group» kompanııasyna tıesili «Alinex Glad» brendimen qurǵaq qurylys qospalary, sondaı-aq «Qaısar» jáne «Krepost» kafel jelimderi daıyndalǵan.
Búgingi tańda jınalǵan materıaldar kináli tulǵalardy Qazaqstan Respýblıkasynyń Ákimshilik quqyq buzýshylyq týraly kodeksiniń 158-baby («Bóten taýar belgisin, qyzmet kórsetý belgisin, taýar shyǵarylǵan jerdiń ataýyn nemese fırmalyq ataýdy zańsyz paıdalaný») boıynsha jaýapqa tartý úshin sotqa jiberildi.
Óńirde kontrafaktilik ónimniń zańsyz aınalymyna qarsy baǵyttalǵan jumystar aldaǵy ýaqytta da júıeli túrde jalǵasady.
Osyǵan deıin Shymkentte zańsyz satylǵan 615 quty kontrafaktilik motor maıy tárkilengeni týraly jazdyq.
