Shymkentte kommýnaldyq tarıfter qalaı ózgerdi
ShYMKENT. KAZINFORM — Shymkentte sý jáne káriz qyzmetiniń tarıfi ózgerissiz qaldy. Al tabıǵı gaz baǵasy 1 shildeden bastap tekshe metrine 13 teńgege ósti.
Jyl basynan beri Ulttyq ekonomıka mınıstrligi Tabıǵı monopolııalardy retteý komıtetiniń Shymkent boıynsha departamentine kommýnaldyq tarıfter men baǵalardy ózgertýge qatysty tabıǵı monopolııa sýbektilerinen 12 ótinish túsken. Onyń jeteýi — kommýnaldyq qyzmetterge qatysty.
Qazirgi ýaqytta «QazaqGaz Aimaq» AQ men «Sý resýrstary-Marketıng» JShS-niń ótinimderi boıynsha sheshim qabyldanǵan. Nátıjesinde turǵyndar úshin sý jáne káriz qyzmetteriniń tarıfteri ózgergen joq.
— Halyqqa kórsetiletin sýmen jabdyqtaý jáne sý burý qyzmetteri boıynsha tarıfter jyl basyndaǵy deńgeıde qaldyryldy. Sýmen jabdyqtaý quny tekshe metr úshin — 96,07 teńge, sý burý QQS-syz tekshe metr úshin — 53,80 teńge, — dedi UEM Tabıǵı monopolııalardy retteý komıteti Shymkent boıynsha departamentiniń basshysy Kenjebolat Kóshekbaev.
Sonymen qatar bıylǵy 1 shildeden bastap Shymkent turǵyndary úshin tabıǵı gaz tarıfi QQS-syz tekshe metrine 51,783 teńge bolyp belgilendi. Bul burynǵy tarıften 13,04 teńge joǵary.
Departamenttiń málimetinshe, tarıftiń ósýine Energetıka mınıstrligi bekitken taýarlyq gazdyń jańa shekti kóterme baǵasy sebep bolǵan. Shymkent pen Túrkistan oblysy úshin bul kórsetkish 39,8 paıyzǵa ósip, QQS-syz myń tekshe metrine 38 349 teńgeden 53 611 teńgege deıin jetken.
Qazirgi ýaqytta jylýmen jabdyqtaý jáne ózge de kommýnaldyq qyzmetterge qatysty tarıftik ótinimder qaralyp jatyr. Olar boıynsha túpkilikti sheshim áli qabyldanǵan joq.
Jyl basynan beri departament 17 tabıǵı monopolııa sýbektilerine qatysty ákimshilik shara qoldanyp, jalpy somasy 47 mln teńgeden astam aıyppul salǵan.
Sondaı-aq tarıfterdiń ashyqtyǵyn qamtamasyz etý maqsatynda bıyl tórt qoǵamdyq tyńdaý ótkizilgen.
Eske salaıyq, jyl basynan beri Qazaqstanda tabıǵı monopolııa sýbektilerine qatysty 535 ákimshilik is qozǵalǵan. Salynǵan aıyppuldardyń jalpy somasy — 922,9 mln teńge, onyń 368,8 mln teńgesi Shymkentke tıesili. Monopolııa sýbektileri tarıftik smetalardy, ınvestıtsııalyq baǵdarlamalardy oryndamaǵany jáne tutynýshylardyń quqyǵyn buzǵany úshin jaýapkershilikke tartylǵan.
