Shymkentte kommýnaldyq mekemeniń júrgizýshileri eńbek jaǵdaıyna shaǵymdandy
ShYMKENT. KAZINFORM – Eńbekshi KMM qyzmetkerleriniń shaǵymynan keıin bul máselege Shymkent qalasynyń ákimdigi men eńbek ınspektsııasy aralasty.
Shymkentte Eńbekshi mekemesiniń 25 júrgizýshisi ashyq úndeý jasap, eńbek jaǵdaıyna qatysty másele kóterdi. Olardyń aıtýynsha, demalys kúnderi jumysqa tartylǵan, biraq eńbek zańnamasyna sáıkes ótemaqy men qosymsha demalys kúnderi berilmegen.
Sondaı-aq júrgizýshiler kásiporyn basshylyǵyna qatysty da shaǵym aıtty. Olardyń sózinshe, keıbir qyzmetkerlerge qysym kórsetilip, negizsiz jumystan shyǵarý áreketteri bolǵan.
Júrgizýshilerdiń úndeýinen keıin Shymkent qalasy ákimdigi basshylyǵy men eńbek ınspektsııasy ókilderiniń qatysýymen kezdesý uıymdastyryldy.
– Barlyq ótinish jazbasha túrde qabyldanyp, zań aıasynda qaralady. Kommýnaldyq sala qyzmetkerleriniń eńbegi eren jáne qurmetke laıyq. Sondyqtan eshbir qyzmetker zańsyz jumystan shyǵarylmaıdy. Jumys kestesin retteý boıynsha naqty tapsyrmalar berildi. Demalys kúnderi jumysqa tartylǵan jaǵdaıda mindetti túrde basqa demalys kúni berilýi tıis. Eńbek zańnamasynyń saqtalýy turaqty baqylaýda bolady. Kásiporyn basshylyǵyna qatysty máseleler qyzmetkerlerdiń ótinishi negizinde quqyqtyq tártippen qaralady, – dedi Shymkent qalasy ákimi apparatynyń basshysy Berik Áshirbekov.
Júrgizýshilerdiń aıtýynsha, kezdesýden keıin olarǵa eńbek quqyqtary túsindirilgen.
– Barlyq másele boıynsha túsindirý jumystary júrgizildi, jumys kestesi retteletin boldy. Eshkimniń zańsyz jumystan shyǵarylmaıtynyna kóz jetkizdik. Kásiporyn basshylyǵyna qatysty ótinishterimizdi zań aıasynda jazbasha túrde beremiz. Jalpy qabyldanǵan sheshimge kóńilimiz toldy, qala ıgiligi úshin jumysymyzdy jalǵastyramyz, – dedi júrgizýshi Qaırat Qonysbaev.
Qala ákimdiginiń málimetinshe, barlyq júrgizýshi óz mindetterine qaıta kirisken. Eńbekshi aýdanyndaǵy kóshelerdi tazalaý boıynsha kommýnaldyq kásiporyn qalypty rejımde jumysyn jalǵastyryp jatyr.
Budan buryn Shymkentte avtokólik ıeleri gaz quıý beketterinde jıi kezekte turatynyn aıtyp, shaǵymdanǵanyn jazǵan edik.
