Shymkentte kolledj basshylary men býhgalterler 1,3 mlrd bıýdjet qarajatyn jymqyrǵan
ASTANA.KAZINFORM - Qarjylyq monıtorıng agenttigi Shymkent qalasy boıynsha departamenti bilim berý salasyna bólingen bıýdjet qarajatyn jymqyrý faktisi boıynsha tergep-tekserýdi aıaqtaǵanyn habarlady.
Tergeý amaldaryna saı, 2018–2023 jyldar aralyǵynda «Ońtústik Qazaqstan joǵary medıtsınalyq kolledji» JShS men «Ońtústik Qazaqstan gýmanıtarlyq-qarjy kolledji» JShS quryltaıshysy jalǵan oqytý shemasyn uıymdastyrǵan.
Qylmystyq shemaǵa kolledj basshylary, býhgalterler jáne ózge de baılanysy bar tulǵalar qatysqan. Azamattar oqý oryndaryna formaldy túrde qabyldanǵanymen, is júzinde bilim almaǵan. Bul memlekettik bilim berý tapsyrysy jáne kadrlardy qaıta daıarlaý baǵdarlamalary aıasynda bıýdjetten qarjy alýǵa múmkindik bergen.
Shema jalǵan oqýǵa qabyldaý jáne jumysqa ornalastyrý týraly buıryqtardy rásimdeý, qujattardy rastaý úshin elektrondyq tsıfrlyq qoltańbalardy paıdalaný, sondaı-aq oryndalǵan jumystar týraly jalǵan aktiler jasaý arqyly júzege asyrylǵan. Sonymen qatar medıtsınalyq kolledjdiń aqyly bóliminde oqyǵan stýdentterdiń bir bóligi memleket esebinen bilim alýshylar retinde rásimdelgeni anyqtaldy. Budan bólek, «Ońtústik Qazaqstan gýmanıtarlyq-qarjy kolledji» is júzinde jumys istemegen jáne tek bıýdjet qarajatyn alý úshin formaldy qurylym retinde paıdalanylǵan. Memleketke keltirilgen jalpy zalal 1,3 mlrd teńgeden asty.
Bir qyzyǵy, shemany uıymdastyrýshy buǵan deıin jasaǵan jymqyrý faktisi úshin sońǵy úsh jyl boıy bas bostandyǵynan aıyrý oryndarynda bola tura, zańsyz áreketterdi sol jerden basqarǵan. Tergeý barysynda kúdiktiler 65 mln teńge kólemindegi zalaldy erikti túrde ótegen.
Sot sanktsııasymen 3 páterge, onyń ishinde Dýbaı qalasyndaǵy páterge, 3 turǵyn úıge jáne 3 avtokólikke tyıym salyndy. Eki kúdiktige qatysty qamaýda ustaý túrindegi bultartpaý sharasy, taǵy úsh tulǵaǵa qatysty eshqaıda ketpeý jáne tıisti minez-qulyq týraly qolhat túrindegi bultartpaý sharasy qoldanyldy.
Qylmystyq is sotqa joldandy.
Qazaqstan Respýblıkasy QPK-niń 201-babyna sáıkes ózge aqparat jarııalaýǵa jatpaıdy.
Aıta keteıik, Qyzylordada 10 jyl boıy bıýdjet qarajatyn jymqyrǵan býhgalterge qatysty úkim shyqty.
