Shymkentte qoǵamdyq kóliktiń jolaqysy qymbattaýy múmkin

ShYMKENT. KAZINFORM – Shymkent qalasynda 83 turaqty marshrýt boıynsha kún saıyn 988 avtobýs jolaýshylarǵa qyzmet kórsetedi. Ótken jyly qalaǵa 19 jańa avtobýs jetkizilse, bıyl taǵy 88 avtobýs satyp alynǵan.

Shymkent qalasy jolaýshylar kóligi jáne avtomobıl joldary basqarmasynyń basshysy Rolan Ibragımovtyń aıtýynsha, kelesi jyly qoǵamdyq kóliktegi jolaqy tarıfi qymbattaýy múmkin.

Qazirgi ýaqytta jolaqy eresekter úshin – 70 teńge, stýdentter úshin – 50 teńge.

– Bul josparda bar. Jolaqy quny shamamen 120 teńge bolady. Alaıda, birinshi toqsanda jolaqy baǵasy qymbattamaıdy, – dedi ol.

Búginde qalada kún saıyn 350-370 myń jolaýshy avtobýs qyzmetin paıdalanady. Basqarma basshysynyń aıtýynsha, kólik keptelisin azaıtyp, jolaýshylar tasymalyn jeńildetý maqsatynda jańa kólik júıesin engizý josparlanyp otyr.

– Qala aýmaǵynda tramvaı men trolleıbýs jelisin salý múmkin emes, sebebi jol boıynda kóptegen kommertsııalyq nysandardyń ınjenerlik kabelderi ornalasqan. Olardy kóshirý qomaqty qarjyny talap etedi. Prezıdenttiń iri qalalarda balamaly kólik túrlerin engizý jónindegi tapsyrmasy aıasynda qazirgi tańda «SkyTrain» jobasy qarastyrylyp jatyr. Atalǵan jobaǵa Túrkııa men Qytaı kompanııalary qyzyǵýshylyq tanytty. Qarjylyq múmkindikteri zerdelenip, bıýdjetke sáıkes kelgen jaǵdaıda joba iske asyrylady, – dedi ol.

Qazirgi tańda qalada qatynaıtyn avtobýstardyń 132-si – 3 jylǵa deıingi, 973-i – 7 jylǵa deıingi, al 45-i – 7 jyldan asqan kólikter sanatyna jatady.

Budan buryn Shymkentte avtobýs júrgizýshisin urǵan jasóspirimge qatysty qylmystyq is toqtatylǵanyn jazǵan edik.