Shymkentte qoǵamdyq kólikterde jolaqy endi tek elektrondy túrde qabyldanady

ShYMKENT. KAZINFORM – Shymkentte jyl basynan beri qoǵamdyq kólikterde bıletsiz júrgen jolaýshylarǵa 3 247 ákimshilik hattama toltyryldy.

Qala ákimdiginiń málimdeýinshe, endi qoǵamdyq kólikterde jolaqy tek elektrondy túrde tólenedi. Atap aıtqanda, tólem kólik kartasy, QR kod, SMS, bank kartalary, arnaıy mobıldi qosymsha (NFC) jáne Apple Pay, Google Pay, Samsung Pay tólem júıeleri arqyly qabyldanady.

– Qaladaǵy qoǵamdyq kólikterde jolaqyny qolma-qol aqshamen nemese júrgizýshiniń jeke shotyna aýdarý arqyly tóleýge bolmaıtynyn habarlaıyz. Jolaýshynyń jolaqyny tólegeni rastalmaǵan jaǵdaıda zań boıynsha ákimshilik shara qoldanylyp, 8650 teńge mólsherinde aıyppul salynady, – delingen qala ákimdigi taratqan aqparatta.

Vedomstvo málimetinshe, tekserýshi toptyń avtobýstardaǵy kúndelikti baqylaýy nátıjesinde 2026 jyldyń basynan beri bıletsiz júrgen jolaýshylarǵa 3 247 ákimshilik hattama rásimdelip, aıyppul salynǵan.

– Osyǵan baılanysty jolaýshylardan qoǵamdyq kólikte jolaqyny ýaqytyly jáne belgilengen tártippen tóleýdi suraımyz. Elektrondy tólem júıesi jolaýshylar aǵynyn naqty esepteýge múmkindik beredi. Bul qoǵamdyq kólikter sanyn arttyrýǵa jáne qyzmet kórsetý sapasyn jaqsartýǵa yqpal etedi, – dep málimdedi qala ákimdigi.

Budan buryn Shymkentte qoǵamdyq kóliktiń jolaqysy qymbattaýy múmkin ekenin jazǵan edik.