Shymkentte qoǵamdyq kólikter «tólem» júıesinen ajyratylady

ShYMKENT. KAZINFORM- 1 mamyrdan bastap qoǵamdyq kólikterde «tólem» júıesiniń valıdatorlary tolyǵymen ajyratylatyn bolady.

Bul sheshim «tólem» júıesiniń operatory — «Qaz SmartTrans» JShS sharttyq mindettemelerin tıisti deńgeıde oryndamaǵanyna baılanysty qabyldanǵan. Osyǵan oraı, taraptar arasyndaǵy kelisimshart birjaqty buzyldy.

— Qoǵamdyq kólik paıdalanýshylaryn aldyn ala qulaqtandyrý maqsatynda valıdatorlardy óshirý protsesi 1 mamyrǵa deıingi ýaqyt aralyǵynda júzege asyrylyp keldi. Bul týraly buqaralyq aqparat quraldary men áleýmettik jeliler arqyly birneshe ret habarlanǵan, — delingen Shymkent qalasynyń ákimdigi taratqan aqparatta.

Búgingi tańda qalalyq baǵyttarda «Avtobys» elektrondyq tólem júıesi turaqty jáne tolyqqandy jumys istep tur. Bul júıe arqyly:

-arnaıy kólik kartalarymen;

-QR-kodty skanerleý arqyly;

-ekinshi deńgeıli bankterdiń tólem kartalarymen (Visa, MasterCard, American Express, UniPay);

-sondaı-aq «Avtobys» mobıldi qosymshasy arqyly tólem jasaýǵa bolady.

Aıta keteıik, budan buryn Shymkentte jalǵan shot-faktýra jasaǵandarǵa 85,1 mln teńge aıyppul salynǵanyn jazǵan bolatynbyz.