Shymkentte qoǵamdyq kólikte bıletsiz júrgenderge salynatyn aıyppul mólsheri ózgerdi
ShYMKENT. KAZINFORM — Shymkent qalasynda qoǵamdyq kólikte bıletsiz júrgen jolaýshylarǵa qatysty jaýapkershilik kúsheıtildi. Ótken jyly salynǵan aıyppul somasy shamamen 70 mıllıon teńgege jýyq bolǵan.
2026 jylǵy 1 qańtardan bastap Shymkentte qoǵamdyq kólikte bıletsiz júrgeni úshin aıyppul mólsheri ulǵaıdy. Bul ákimshilik aıyppuldardy esepteý kezinde qoldanylatyn aılyq eseptik kórsetkishtiń (AEK) ósýimen baılanysty.
2025 jyly AEK mólsheri 3 932 teńge bolsa, 2026 jyldyń basynan bastap ol 4 325 teńgege deıin artty. Osyǵan sáıkes, avtobýsta bıletsiz júrgeni úshin salynatyn aıyppul kólemi de ósti.
Qoldanystaǵy zańnamaǵa sáıkes, bıletsiz jol júrgeni úshin aıyppul kólemi — 2 AEK, ıaǵnı 2026 jyly bul soma 8 650 teńgege teń. Al ótken jyly aıyppul mólsheri 7 864 teńge bolǵan.
— Jolaýshylardy avtobýsqa mingen sátten bastap jolaqysyn ýaqytynda tóleýge jáne sapar sońyna deıin elektrondy bıletti saqtaýǵa shaqyramyz, — dep habarlady qalalyq jolaýshylar kóligi jáne avtomobıl joldary basqarmasy.
Vedomstvo málimetinshe, 2025 jyly Shymkentte bıletsiz jol júrgeni úshin 8 890 ákimshilik hattama toltyrylǵan. Aıyppul mólsheri 2 AEK (7 864 teńge) bolǵan jaǵdaıda, salynǵan aıyppuldardyń jalpy somasy — 69 910 960 teńge.
Qalada jolaqy tóleýdi kún saıyn qoǵamdyq kólik baǵyttaryna shyǵatyn 110 kontroler baqylaıdy.
Mamandardyń aıtýynsha, tólemniń durys ári tolyq tirkelýi búkil kólik júıesiniń tıimdi jumysyna tikeleı áser etedi.
— Ákimdik sheshimimen tegin jol júrý quqyǵy berilgen azamattardyń ózi kólik kartasyn planshet arqyly mindetti túrde valıdatsııadan ótkizýi qajet. Jolaqysyn tólemeıtin nemese qolma-qol aqshany júrgizýshige beretin jolaýshylar júıede tirkelmeıdi. Bul jolaýshylar aǵynyn taldaýdy burmalap, júktemesi joǵary baǵyttarǵa qosymsha avtobýstardyń ýaqytyly shyǵarylmaýyna ákelýi múmkin. Sebebi júıe tek tólengen saparlar men valıdatordan ótken kartalardy ǵana esepke alady, — dedi «Smart mobility» JShS — Avtobys elektrondy bıletteý jáne dıspetcherleý júıesiniń dırektory Jomart Kamıdollın.
Budan buryn 2026 jyly Shymkentte qoǵamdyq kóliktiń jolaqysy qymbattaýy múmkin ekenin jazǵan edik.