Shymkentte jol júrý aqysy qymbattaı ma - ákimdik jaýap berdi
ShYMKENT. KAZINFORM - Qala ákimi Ǵabıt Syzdyqbekov qalalyq máslıhattyń naýryz aıyndaǵy sessııasynyń kún tártibinen jolaqyny kóterý máselesin qarastyrýdy alyp tastady.
Áleýmettik jelide Shymkent qalasyndaǵy qoǵamdyq kólikterde jolaqynyń qymbattaıtyny týraly aqparat taraǵan bolatyn. Onda elektrondy tólem 100 teńgeni qurasa, qolma-qol eseptesý 200 teńge bolatyny aıtyldy. Tipti, bul týraly aqparat talqylaý maqsatynda «Ashyq NQA» portalynada jarııalanǵan.
Búgin resmı aqparat taratqan Shymkent qalasy ákimdiginiń baspasóz qyzmeti jolaqynyń qymbattamaıtynyn jetkizdi.
«Qoǵamdyq kólikterdegi jolaqyny kóterý mańyzdy másele jáne bul jan-jaqty zerdeleýdi talap etedi. Jol aqysyn kóterý tasymaldaýshylar tarapynan kórsetiletin qyzmetterdiń sapasy jaqsarǵan, jolaýshylardy tasymaldaý qaýipsizdigi qamtamasyz etilgen jaǵdaılarda ǵana múmkin bolady. Alaıda, azamattardyń keıbir sanattaryna, ásirese, halyqtyń áleýmettik osal toptaryna jeńildikter berý máselesi qarastyrylady. Qala ákimi Ǵabıt Syzdyqbekov atalǵan baǵyttaǵy qazirgi jaǵdaılardy muqııat zerdelep, qalalyq máslıhattyń naýryz aıyndaǵy sessııasynyń kún tártibinen jolaqyny kóterý máselesin qarastyrýdy alyp tastaý týraly sheshim qabyldady» - delingen ákimdik taratqan aqparatta.
Sondaı-aq ákimdik tasymaldaýshylardyń jaýapkershiligin kúsheıtýdi, avtoparkterdi jańartýdy jalǵastyrýdy josparlap otyrǵanyn málimdedi.
«Bul rette ekologııalyq ahýaldy jaqsartý úshin áleýetti ınvestorlarmen elektr avtobýstary men marshrýttarǵa qyzmet kórsetý jáne kóliktiń basqa da balamaly túrlerin engizý boıynsha kelissózder júrgizilýde. Bul máselelerdi sheshý jáne jolaýshylarǵa qolaıly jaǵdaı jasaý belgili bir ýaqytty qajet etedi» - delingen aqparatta.
